പാലക്കാട്: രണ്ടു വർഷമായി മുടങ്ങിക്കിടന്ന കൽപ്പാത്തി ദേശീയ സംഗീതോത്സവത്തിനുള്ള ടൂറിസം വകുപ്പിന്റെ സാമ്പത്തിക സഹായം ഈ വർഷം മുതൽ പുനഃസ്ഥാപിക്കുമെന്ന് ടൂറിസം മന്ത്രി പി.സി. വിഷ്ണുനാഥ് അറിയിച്ചു. പ്രാദേശിക എം.പിയും എം.എൽ.എയും നടത്തിയ ഇടപെടലുകളെത്തുടർന്നാണ് തീരുമാനമെന്നും മന്ത്രി പറഞ്ഞു.

ചരിത്രപ്രസിദ്ധമായ കൽപ്പാത്തി രഥോത്സവത്തിന്റെ ഭാഗമായി സംഘടിപ്പിച്ച ദേശീയ സംഗീതോത്സവത്തിന്റെ ഉദ്ഘാടനച്ചടങ്ങിൽ സംസാരിക്കുകയായിരുന്നു അദ്ദേഹം. മന്ത്രി കെ.എ. തുളസി മുഖ്യാതിഥിയായി. എം.എൽ.എ രമേഷ് പിഷാരടി അധ്യക്ഷത വഹിച്ചു. എം.പി വി.കെ. ശ്രീകണ്ഠനും ചടങ്ങിൽ പങ്കെടുത്തു.

മൈസൂർ സഹോദരന്മാർ എന്നറിയപ്പെടുന്ന മൈസൂർ നാഗരാജും മൈസൂർ മഞ്ജുനാഥും അവതരിപ്പിച്ച വയലിൻ കച്ചേരിയോടെയാണ് സംഗീതോത്സവത്തിന് തുടക്കമായത്. അനന്ത ആർ. കൃഷ്ണൻ മൃദംഗത്തിലും വാഴപ്പള്ളി ആർ. കൃഷ്ണകുമാർ ഘടത്തിലും അകമ്പടി നൽകി.

രഥോത്സവത്തോടനുബന്ധിച്ച് നവംബർ 16ന് പാലക്കാട് താലൂക്കിലെ സർക്കാർ ഓഫീസുകൾക്കും വിദ്യാഭ്യാസ സ്ഥാപനങ്ങൾക്കും ജില്ലാ ഭരണകൂടം പ്രാദേശിക അവധി പ്രഖ്യാപിച്ചു. നേരത്തേ നിശ്ചയിച്ച പരീക്ഷകൾക്ക് അവധി ബാധകമായിരിക്കില്ല.

11 ദിവസം നീളുന്ന രഥോത്സവം നവംബർ 17ന് സമാപിക്കും. ആറു ക്ഷേത്രരഥങ്ങൾ സംഗമിക്കുന്ന പ്രസിദ്ധമായ ദേവരഥസംഗമമാണ് ഉത്സവത്തിലെ പ്രധാന ആകർഷണം. നവംബർ 16ന് വൈകിട്ടാണ് ദേവരഥസംഗമം നടക്കുക. നവംബർ 14, 15, 16 തീയതികളിലാണ് രഥപ്രയാണം.