ആലപ്പുഴ: ട്രാന്സ്ജെന്ഡറിന്റെ നഗ്നവീഡിയോ സമൂഹമാധ്യമങ്ങളില് പ്രചരിപ്പിച്ച സംഭവത്തില് വനിതാ എഎസ്ഐക്കു സസ്പെന്ഷന്. ആലപ്പുഴ വനിതാ ഹെല്പ്ലൈനിലെ എഎസ്ഐ ആര്.ശ്രീലതയെയാണ് അന്വേഷണവിധയേമായി സസ്പെന്ഡ് ചെയ്തത്. ജില്ലാ പോലീസ് മേധാവി എസ്.സുരേന്ദ്രന് ഇതു സംബന്ധിച്ച് ഉത്തരവ് പുറപ്പെടുവിച്ചു.
കഴിഞ്ഞ ദിവസം ആലപ്പുഴ സൗത്ത് പോലീസ് കസ്റ്റഡിയിലെടുത്ത ട്രാന്സ്ജെന്ഡറിന്റെ വീഡിയോ ദൃശ്യങ്ങളാണ് സമൂഹമാധ്യമങ്ങളില് പ്രചരിച്ചത്. സ്റ്റേഷനുള്ളിലാണ് ദൃശ്യങ്ങള് ചിത്രീകരിച്ചതെന്ന് പ്രചരിക്കുന്ന വീഡിയോയില് വ്യക്തമാണ്. ഈ ദൃശ്യങ്ങള് പകര്ത്തിയത് ശ്രീലതയാണെന്ന് അന്വേഷണത്തില് കണ്ടെത്തി. ദൃശ്യങ്ങള് ലഭിച്ചത് ആര്ക്കെല്ലാമാണെന്ന് സൈബര് സെല് അന്വേഷണം നടത്തുന്നുണ്ട്.
പൊതുസ്ഥലത്ത് മദ്യപിച്ച് ശല്യമുണ്ടാക്കിയെന്ന പരാതിയിലാണ് ആലപ്പുഴ സ്വദേശിയായ ട്രാന്സ്ജെന്ഡറെ പോലീസ് കസ്റ്റഡിയിലെടുത്തത്. സ്റ്റേഷനില് കൊണ്ടുവന്ന ശേഷം ട്രാന്സ്ജെന്ഡറിനെ നഗ്നയാക്കി ദൃശ്യങ്ങള് പോലീസുകാര് മൊബൈലില് പകര്ത്തുകയായിരുന്നു.