ബിജെപി നേതാവിന്റെ സഹോദരിക്ക് ക്ഷേമനിധി ബോര്‍ഡില്‍ താല്‍ക്കാലിക നിയമനം; കോണ്‍ഗ്രസില്‍ വിവാദം

പാലക്കാട്: ബിജെപി മഹിളാ മോര്‍ച്ച ജില്ലാ നേതാവിന്റെ സഹോദരിക്ക് കേരള കര്‍ഷക തൊഴിലാളി ക്ഷേമനിധി ബോര്‍ഡില്‍ താല്‍ക്കാലിക നിയമനം നല്‍കിയതിനെച്ചൊല്ലി പാലക്കാട് കോണ്‍ഗ്രസില്‍ വിവാദം. നിയമനം റദ്ദാക്കണമെന്നും ഇതിന് പിന്നില്‍ പ്രവര്‍ത്തിച്ചവര്‍ക്കെതിരെ നടപടിയെടുക്കണമെന്നും ആവശ്യപ്പെട്ട് കോണ്‍ഗ്രസ് നേതാക്കള്‍ രംഗത്തെത്തി.
ബിജെപി മഹിളാ മോര്‍ച്ച പാലക്കാട് ജില്ലാ സെക്രട്ടറി അശ്വതി മണികണ്ഠന്റെ സഹോദരി ഐശ്വര്യയ്ക്കാണ് ക്ഷേമനിധി ബോര്‍ഡില്‍ താല്‍ക്കാലിക നിയമനം ലഭിച്ചത്. പാലക്കാട്ടെ ചില മുതിര്‍ന്ന കോണ്‍ഗ്രസ് നേതാക്കള്‍ നിയമനത്തിന് വഴിയൊരുക്കിയെന്ന ആരോപണമാണ് പാര്‍ട്ടിക്കുള്ളില്‍ ഉയര്‍ന്നിരിക്കുന്നത്.
നിയമനം റദ്ദാക്കണമെന്നും ഇതിന് ഉത്തരവാദികളായവര്‍ക്കെതിരെ നടപടി സ്വീകരിക്കണമെന്നും ആവശ്യപ്പെട്ട് പാലക്കാട് ബ്ലോക്ക് കോണ്‍ഗ്രസ് നേതാക്കള്‍ മുഖ്യമന്ത്രിക്കും കെപിസിസി പ്രസിഡന്റിനും ജില്ലാ കോണ്‍ഗ്രസ് കമ്മിറ്റി (ഡിസിസി) പ്രസിഡന്റ് എ. തങ്കപ്പനും പരാതി നല്‍കി.
പാര്‍ട്ടിക്കുവേണ്ടി ദീര്‍ഘകാലമായി പ്രവര്‍ത്തിച്ചിട്ടുള്ള പ്രവര്‍ത്തകരെ അവഗണിച്ചാണ് നിയമനം നടത്തിയതെന്നാണ് ഒരു വിഭാഗത്തിന്റെ ആരോപണം. ഇതോടെ ജില്ലാ കോണ്‍ഗ്രസിനുള്ളിലെ ഭിന്നതയും രൂക്ഷമായി.
പരാതി ലഭിച്ചതായി ഡിസിസി പ്രസിഡന്റ് എ. തങ്കപ്പന്‍ സ്ഥിരീകരിച്ചു. വിഷയം പരിശോധിക്കുമെന്നും നിയമനത്തില്‍ ക്രമക്കേടോ മാനദണ്ഡങ്ങളുടെ ലംഘനമോ നടന്നതായി കണ്ടെത്തിയാല്‍ പാര്‍ട്ടി ഇടപെടുമെന്നും അദ്ദേഹം പറഞ്ഞു. ചട്ടലംഘനം ഉണ്ടായിട്ടുണ്ടെങ്കില്‍ ആവശ്യമായ തിരുത്തല്‍ നടപടികള്‍ സ്വീകരിക്കുമെന്നും അദ്ദേഹം വ്യക്തമാക്കി.

Leave a Reply

Your email address will not be published. Required fields are marked *