ശബരിമല: ശബരിമലയിലെ നിരോധനാജ്ഞ നാല് ദിവസത്തേക്ക് കൂടി നീട്ടി. ഇലവുങ്കല് മുതല് സന്നിധാനം വരെ എല്ലാ പ്രദേശങ്ങളിലും മുഴുവന് റോഡുകളിലും ഉപറോഡുകളിലും പ്രഖ്യാപിച്ചിരുന്ന നിരോധനാജ്ഞ നവംബര് 26ന് അര്ധരാത്രി വരെ നീട്ടി ജില്ലാ മജിസ്ട്രേട്ടും ജില്ലാ കളക്ടറുമായ പി.ബി. നൂഹ് ഉത്തരവിറക്കി.
ശബരിമല ദര്ശനത്തിന് എത്തുന്ന തീര്ഥാടകരുടെ സംരക്ഷണം ഉറപ്പാക്കുന്നതിനും ക്രമസമാധാനം നിലനിര്ത്തി ജനങ്ങളുടെ ജീവനും സ്വത്തിനും സംരക്ഷണം നല്കുന്നതിനും പൊതുമുതല് സംരക്ഷിക്കുന്നതിനുമാണ് നിരോധനാജ്ഞ പ്രഖ്യാപിച്ചിട്ടുള്ളത്.
നിയമവിരുദ്ധമായി സംഘം ചേരുന്നതും, പ്രകടനം, പൊതുയോഗം, വഴിതടയല് എന്നിവ നടത്തുന്നതും നിരോധിച്ചിട്ടുണ്ട്. ശബരിമല ദര്ശനത്തിന് എത്തുന്ന തീര്ഥാടകര്ക്ക് സമാധാനപരമായ ദര്ശനം, അവരുടെ വാഹനങ്ങളുടെ സുഗമമായ സഞ്ചാരം എന്നിവ നിരോധനാജ്ഞയില് നിന്നും ഒഴിവാക്കിയിട്ടുണ്ട്. ഭക്തര്ക്ക് ഒറ്റയ്ക്കോ, സംഘമായോ ദര്ശനത്തിന് എത്തുന്നതിനോ, ശരണം വിളിക്കുന്നതിനോ നിരോധനാജ്ഞയെത്തുടര്ന്ന് യാതൊരു തടസവും ഉണ്ടാകില്ലെന്ന് ഉത്തരവില് പറയുന്നു.