ആദിവാസി നേതാവ് സികെ ജാനു എല്ഡിഎഫിലേക്ക്. കോഴിക്കോട് വെച്ച് നടന്ന ജനാധിപത്യ രാഷ്ട്രീയ സഭയുടെ സംസ്ഥാന നേതൃയോഗമാണ് ഇക്കാര്യത്തില് അന്തിമ തീരുമാനമെടുത്തത്. എല്ഡിഎഫുമായി നടത്തിയ ചര്ച്ചകള് അനുകൂലമാണെന്നും ഉടന് എല്ഡിഎഫിന്റെ ഭാഗമാകാന് സാധിക്കുമെന്നാണ് പ്രതീക്ഷയെന്നും സികെ ജാനു വ്യക്തമാക്കുന്നു. രണ്ടര വര്ഷക്കാലത്തെ എന്ഡിഎ ബന്ധം ഉപേക്ഷിച്ചാണ് സികെ ജാനുവിന്റെ നേതൃത്വത്തിലുള്ള രാഷ്ട്രീയ പാര്ട്ടിയായ ജനാധിപത്യ രാഷ്ട്രീയ സഭ എല്ഡിഎഫിന്റെ ഭാഗമാകാന് ഒരുങ്ങുന്നത്.
ആദിവാസി വിഭാഗത്തിന് ബിജെപിയും എന്ഡിഎയും നല്കിയ ഉറപ്പുകളൊന്നും രണ്ടര വര്ഷം കഴിഞ്ഞിട്ടും പാലിക്കാന് തയ്യാറായില്ലെന്നും കേരളത്തിലെ ആദിവാസി വിഭാഗത്തെ ബിജെപി വഞ്ചിക്കുകയാണ് ചെയ്തതെന്നും സികെ ജാനു നേരത്തേ തന്നെ വ്യക്തമാക്കിയിരുന്നു. ഇതിന് പിന്നാലെയാണ് സംസ്ഥാന നേതൃയോഗം ഇക്കാര്യത്തില് അന്തിമ തീരുമാനം കൈക്കൊള്ളുന്നത്.