വടകര: നെഹ്റു ഗ്രൂപ്പ് ചെയര്മാന് പി.കൃഷ്ണദാസിന്റെ മുന്കൂര് ജാമ്യാപേക്ഷയില് വാദം കേള്ക്കുന്ന ഹൈക്കോടതി ജഡ്ജിക്കെതിരെ ജിഷ്ണു പ്രണോയിയുടെ അമ്മ ചീഫ് ജസ്റ്റിസിന് പരാതി നല്കി. വാദം കേള്ക്കുന്ന ജഡ്ജിക്ക് നെഹ്റു ഗ്രൂപ്പുമായി ബന്ധമുണ്ടെന്ന ആരോപണം പരിശോധിക്കണമെന്നാണ് പരാതി. ബന്ധം തെളിയിക്കുന്ന തരത്തില് സോഷ്യല് മീഡിയയില് പ്രചരിക്കുന്ന ചിത്രങ്ങള് ഉള്പ്പെടുത്തിയാണ് പരാതി നല്കിയിരിക്കുന്നത്.
ജിഷ്ണു കേസിലെ ഒന്നാം പ്രതിയായിട്ടുള്ള കൃഷ്ണദാസും ജഡ്ജിയുമൊത്തുള്ള ആറ് ഫോട്ടോകള് സോഷ്യല് മീഡിയയില് നിന്ന് ലഭിച്ചു. നീതിന്യായ വ്യവസ്ഥയില് വിശ്വസിക്കുന്ന എനിക്ക് ഇത് കണ്ടപ്പോള് നീതി ലഭിക്കില്ല എന്ന ബോധം ഉണ്ടായി.കൃഷ്ണദാസുമായി ജഡ്ജിക്കുള്ള ബന്ധം സുതാര്യമാണെന്ന് ബോധ്യപ്പെടുത്തരണം തുടങ്ങിയ കാര്യങ്ങളാണ് പരാതിയില് പറയുന്നത്.
കൃഷ്ണദാസിന്റെ അറസ്റ്റ് ചെയ്ത സംഭവത്തില് ജഡ്ജി കഴിഞ്ഞ ദിവസം പോലീസിനെ രൂക്ഷമായി വിമര്ശിച്ചിരുന്നു.