തിരുവനന്തപുരം: ഗുരുവായൂരില് വിശ്വാസികളായ അഹിന്ദുക്കള്ക്കും പ്രവേശനം നല്കുന്ന കാര്യത്തില് ചര്ച്ച ഉടനെന്ന് ദേവസ്വം മന്ത്രി കടകംപള്ളി സുരേന്ദ്രന്. ഇക്കാര്യം ദേവസ്വം ബോര്ഡുമായി ചര്ച്ച ചെയ്യുമെന്നും മന്ത്രി പറഞ്ഞു. ഗുരുവായൂര് ക്ഷേത്രത്തില് അഹിന്ദുക്കള് പ്രവേശിക്കുന്ന വിഷയത്തില് സര്ക്കാര് മുന്കൈ എടുക്കണമെന്ന് തന്ത്രി ചേന്നാസ് ദിനേശന് നമ്ബൂതിരിപ്പാട് വ്യക്തമാക്കിയിരുന്നു. ഇതിന് പിന്നാലെയാണ് മന്ത്രി ഇക്കാര്യം അറിയിച്ചത്.
ഇക്കാര്യത്തില് തന്ത്രി പണ്ഡിത സമൂഹങ്ങളുമായി ആലോചിച്ച് നിയമാവലി ഉണ്ടാക്കണമെന്നും അദ്ദേഹം വ്യക്തമാക്കിയിരുന്നു. കാലത്തിന്റെ പ്രത്യേകതയനുസരിച്ചാണ് ആചാരങ്ങള് ഉണ്ടാകുന്നത്. മാറ്റം വരുത്തേണ്ടതുണ്ടെങ്കില് സര്ക്കാരാണ് അഭിപ്രായം ക്രോഡീകരിക്കേണ്ടത്. സര്ക്കാര് തയ്യാറായാല് തന്ത്രി കുടുംബം സഹകരിക്കുമെന്നും അദ്ദേഹം വ്യക്തമാക്കിയിരുന്നു.
ഗുരുവായൂര് ക്ഷേത്രത്തില് അഹിന്ദുക്കള്ക്ക് പ്രവേശനം നല്കുന്നതില് എതിര്പ്പില്ലെന്ന ഗുരുവായൂര് ക്ഷേത്ര തന്ത്രി കുടുംബാംഗം ചേന്നാസ് ദിനേശന് നമ്ബൂതിരിപ്പാടിന്റെ നിലപാടിനെ സ്വാഗതം ചെയ്യുന്നുവെന്ന് സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന് പറഞ്ഞു.