കൊച്ചി: ഷൊര്ണൂര് എം.എല്.എയും സി.പി.എം നേതാവുമായ പി.കെ.ശശി ലൈംഗികമായി പീഡിപ്പിച്ചുവെന്ന പരാതിയില് ഉറച്ചുനില്ക്കുന്നുവെന്ന് യുവതി. സിപിഎം നിശ്ചയിച്ച അന്വേഷണ കമീഷന് അംഗം പി.കെ.ശ്രീമതിക്ക് നല്കിയ മൊഴിയിലാണ് പരാതിക്കാരി ഇക്കാര്യം ആവര്ത്തിച്ചത്. സമിതിയുടെ അന്വേഷണ റിപ്പോര്ട്ട് സംസ്ഥാന കമ്മറ്റിക്ക് ഉടന് കൈമാറുമെന്നാണ് സൂചന.
ഫോണ് വഴിയാണ് ശ്രീമതി പരാതിക്കാരിയുടെ മൊഴിയെടുത്തത്. മന്ത്രി എ.കെ ബാലനാണ് പി.കെ ശശിയുടെ മൊഴി എടുത്തതെന്നാണ് വിവരം. ഈ മാസം 25ന് മുന്പ് റിപ്പോര്ട്ട് സമര്പ്പിക്കണമെന്ന് പാര്ട്ടി സംസ്ഥാന സെക്രട്ടറി കോടിയേരി ബാലകൃഷ്ണന് കമ്മീഷന് അംഗങ്ങള്ക്ക് നിര്ദേശം നല്കിയിരുന്നു.
അതേസമയം ലൈംഗികപീഡനക്കേസില് ആരോപണവിധേയനായ പി.കെ. ശശിക്ക് ഷൊര്ണൂര് എംഎല്എ എന്ന പരിഗണന ലഭിക്കില്ലെന്ന് സ്പീക്കര് പി. ശ്രീരാമകൃഷ്ണന് പറഞ്ഞിരുന്നു. നിയമം നിയമത്തിന്റെ വഴിക്കു പോകുമെന്നും ഓരോ പാര്ട്ടിക്കും അവരുടേതായ രീതികളുണ്ടെന്നും ശ്രീരാമകൃഷ്ണന് വ്യക്തമാക്കിയിരുന്നു.