തിരുവനന്തപുരം: ബ്രൂവറികള്ക്കും ബ്ലെന്ഡിംഗ് യൂണിറ്റുകള്ക്ക് നല്കിയ അനുമതി സംസ്ഥാന സര്ക്കാര് റദ്ദാക്കി. നിലവിലെ വിവാദങ്ങള് ഒഴിവാക്കാനാണ് ഈ നടപടിയെന്നും ഭാവിയില് ബ്രൂവറികള്ക്കും ബ്ലെന്ഡിംഗുകള്ക്കും അനുമതി നല്കില്ല എന്ന് അര്ഥമില്ലെന്നും മുഖ്യമന്ത്രി വ്യക്തമാക്കി. തിരുവനന്തപുരത്ത് വാര്ത്താ സമ്മേളനത്തിലാണ് മുഖ്യമന്ത്രി ഇക്കാര്യം വ്യക്തമാക്കിയത്.
അനുമതി റദ്ദാക്കിയെങ്കിലും ബ്രൂവറികളും ബ്ലെന്ഡിംഗ് യൂണിറ്റും അനുവദിച്ചതില് ഒരു വീഴ്ചയുമുണ്ടായിട്ടില്ലെന്ന് മുഖ്യമന്ത്രി ന്യായീകരിച്ചു. എക്സൈസ് വകുപ്പ് എല്ലാ ചട്ടങ്ങളും പരിശോധിച്ച് തന്നെയാണ് അനുമതി നല്കിയിരുന്നത്. സര്ക്കാരിന് ഇക്കാര്യത്തില് ഒരു വീഴ്ചയുമുണ്ടായിട്ടില്ല. എന്നാല് പ്രളയാനന്തര പ്രവര്ത്തനങ്ങള് നടക്കുന്ന ഈ സമയത്ത് എല്ലാവരും ഒരുമിച്ച് നില്ക്കേണ്ട സാഹചര്യം കൂടി പരിഗണിച്ച് നടപടിയില് നിന്നും പിന്മാറുകയാണെന്നാണ് മുഖ്യമന്ത്രി വിശദീകരിച്ചത്.