തിരുവനന്തപുരം: ശബരിമലയില് യുവതികളെ എങ്ങനെയെങ്കിലും പ്രവേശിപ്പിക്കണമെന്ന വാശി സര്ക്കാരിന് ഇല്ലെന്ന് ദേവസ്വം ബോര്ഡ് മന്ത്രി കടകംപള്ളി സുരേന്ദ്രന്. എങ്ങനെയെങ്കിലും യുവതികളെ ശബരിമലയില് പ്രവേശിപ്പിക്കണമെന്ന നിലപാട് ഇടതുമുന്നണിക്കുമില്ലെന്നും തന്റേ ഫെസ്ബുക്ക് പോസ്റ്റില് അദ്ദേഹം വ്യക്തമാക്കി.
ഇന്നത്തെ സര്വകക്ഷി യോഗത്തില് മുഖ്യമന്ത്രി അര്ത്ഥശങ്കയ്ക്ക് ഇടയില്ലാതെ ഇക്കാര്യം വ്യക്തമാക്കിയിട്ടുണ്ട്. യുവതികളെ ശബരിമലയിലേക്ക് കൊണ്ടുപോകാന് സര്ക്കാരോ എല്.ഡി.എഫോ ഒന്നും ചെയ്തിട്ടില്ല. തൃപ്തി ദേശായിയെ പോലുള്ളവരുടെ പിന്നില് ആരാണെന്നത് പകല് പോലെ വ്യക്തമാണെന്നും ഫേസ്ബുക്ക് പോസ്റ്റില് പറയുന്നു.
സുപ്രീം കോടതി ഭരണഘടനാ ബഞ്ചിന്റെ വിധിക്കെതിരെ സര്ക്കാരിന് നിലപാടെടുക്കാനാകില്ലെന്ന് എല്ലാവരും സമ്മതിക്കുന്നുണ്ട്. പ്രശ്നങ്ങള് ഒഴിവാക്കി ക്രമീകരണമുണ്ടാക്കാന് വേണ്ട കാര്യങ്ങള് ദേവസ്വം ബോര്ഡ് ആലോചിക്കുമെന്നും അദ്ദേഹം പറയുന്നു.