തിരുവനന്തപുരം: മദ്ധ്യകിഴക്കന് അറബിക്കടലില് രൂപം കൊണ്ട ന്യൂനമര്ദം ചുഴലിക്കാറ്റായി ശക്തി പ്രാപിച്ചെന്ന് കേന്ദ്ര കാലാവസ്ഥ വകുപ്പ് അറിയിച്ചു. ക്യാര് എന്ന് പേരിട്ട ഈ കാറ്റിന്റെ സഞ്ചാരപഥത്തില് കേരളമില്ലെങ്കിലും അതിന്റെ സ്വാധീനം കാരണം ചിലയിടങ്ങളില് ഒറ്റപ്പെട്ട കനത്തമഴയ്ക്ക് സാദ്ധ്യതയുണ്ട്. ഇന്ന് അഞ്ചുജില്ലകളില് യെലോ അലര്ട്ട് പ്രഖ്യാപിച്ചു.
ഇടുക്കി, മലപ്പുറം, കോഴിക്കോട്, കണ്ണൂര്, കാസര്കോട് ജില്ലകളിലാണ് ഒറ്റപ്പെട്ട ശക്തമായ മഴ പ്രതീക്ഷിക്കുന്നത്. വടക്കുപടിഞ്ഞാറ് ദിശയിലാണ് ചുഴലിക്കാറ്റ് നീങ്ങുന്നത്. കേരളം, കര്ണാടകം, ലക്ഷദ്വീപ് തീരങ്ങളില് കൂറ്റന് തിരമാലകള്ക്ക് സാദ്ധ്യതയുണ്ട്. മദ്ധ്യകിഴക്കന് അറബിക്കടലില് 28 വരെയും മദ്ധ്യപടിഞ്ഞാറന് അറബിക്കടലില് 28 മുതല് 31 വരെയും പോകരുതെന്ന് മുന്നറിയിപ്പുണ്ട്.
ക്യാര് ചുഴലിക്കാറ്റിന്റെ സ്വാധീനമുള്ളത് കൊണ്ടുതന്നെ മത്സ്യത്തൊഴിലാളികള് ഒരു കാരണവശാലും കടലില് പോകാന് പാടുള്ളതല്ലതെന്നും കേരള സംസ്ഥാന ദുരന്ത നിവാരണ അതോറിറ്റി കഴിഞ്ഞ ദിവസം അറിയിച്ചിരുന്നു. ‘ക്യാര്’ ചുഴലിക്കാറ്റിന്റെ വികാസത്തെയും സഞ്ചാരത്തെയും സംസ്ഥാന ദുരന്ത നിവാരണ അതോറിറ്റിയും കേന്ദ്ര കാലാവസ്ഥ വകുപ്പും സൂക്ഷ്മമായി നിരീക്ഷിച്ചു വരികയാണ്.