അറബിക്കടലില് ചുഴലിക്കാറ്റ് രൂപപ്പെടാന് സാധ്യതയെന്ന് കേന്ദ്ര കാലാവസ്ഥ വകുപ്പ്. തെക്ക് കിഴക്കന് അറബിക്കടലില് 14 ന് രാവിലെയോടെ ന്യൂനമര്ദം രൂപപ്പെടാനാണ് സാധ്യത. ലക്ഷദ്വീപിന് സമീപം വടക്ക് പടിഞ്ഞാറ് ദിശയില് സഞ്ചരിക്കുന്ന ന്യൂനമര്ദം 16 ഓടെ ചുഴലിക്കാറ്റായി മാറാനാണ് സാധ്യത. കേരളത്തില് 14 മുതല് ശക്തമായ മഴയ്ക്ക് സാധ്യതയുണ്ട്.
നിലവില് പ്രവചിക്കപ്പെട്ടിരിക്കുന്ന ന്യൂനമര്ദത്തിന്റെ സഞ്ചാരപഥത്തില് കേരളം ഇല്ലെങ്കിലും ന്യൂനമര്ദ രൂപീകരണ ഘട്ടത്തില് ശക്തമായ കടലാക്രമണവും ശക്തമായ കാറ്റും കേരളത്തിന്റെ വിവിധയിടങ്ങളില് ശക്തമായ മഴയ്ക്കും സാധ്യതയുണ്ട്. നിര്ദ്ദേശങ്ങള് മുന്നില് കണ്ടുകൊണ്ടുള്ള തയ്യാറെടുപ്പുകള് സര്ക്കാര് സംവിധാനങ്ങളും പൊതുജനങ്ങളും സ്വീകരിക്കണമെന്ന് ദുരന്തനിവാരണ അതോറിറ്റി അറിയിച്ചു.
കടലില് മോശമായ കാലാവസ്ഥയ്ക്കും ശക്തമായ കാറ്റിനും സാധ്യതയുള്ളതിനാല് കേരള തീരത്ത് നിന്നുള്ള മല്സ്യബന്ധനം 2021 മേയ് 14 മുതല് ഒരു അറിയിപ്പുണ്ടാകുന്നത് വരെ പൂര്ണ്ണമായും നിരോധിച്ചതായി സംസ്ഥാന ദുരന്ത നിവാരണ അതോറിറ്റി അറിയിച്ചു. നിലവില് ആഴക്കടലില് മല്സ്യബന്ധനത്തിലേര്പ്പെട്ട് കൊണ്ടിരിക്കുന്ന മല്സ്യത്തൊഴിലാളികള് മേയ് 14 ന് മുന്നോടിയായി അടുത്തുള്ള സുരക്ഷിത തീരത്തേക്ക് എത്തണമെന്നും ദുരന്ത നിവാരണ അതോറിറ്റി നിര്ദ്ദേശിച്ചു.