കൊച്ചി: നടി ആക്രമിക്കപ്പെട്ട കേസില് കുറ്റപത്രം ചോര്ന്നത് അന്വേഷിക്കണമെന്നാവശ്യപ്പെട്ട് നടന് ദിലീപ് നല്കിയ ഹര്ജിയില് പോലീസ് ഇന്ന് റിപ്പോര്ട്ട് സമര്പ്പിക്കും.അങ്കമാലി കോടതിയിലാണ് റിപ്പോര്ട്ട് സമര്പ്പിക്കുക. അതേ സമയം യു എ ഇ കരാമയില് തുടങ്ങിയ ദേ പുട്ട് റസ്റ്റോറന്റിന്റെ ഉദ്ഘാടന ചടങ്ങില് പങ്കെടുക്കാന് പോയ ദിലീപ് ഇന്ന് നാട്ടില് തിരിച്ചെത്തും.
നടി ആക്രമിക്കപ്പെട്ട കേസില് ദിലീപ് ഉള്പ്പടെയുള്ളവര് പ്രതികളായ അനുബന്ധകുറ്റപത്രം അങ്കമാലി കോടതിയില് സമര്പ്പിച്ച ദിവസം കുറ്റപത്രത്തിലെ വിശദാംശങ്ങള് മാധ്യമങ്ങളിലൂടെ പുറത്തുവന്നിരുന്നു.ഇതെ തുടര്ന്ന് കുറ്റപത്രം പോലീസ് ചോര്ത്തിയെന്നാരോപിച്ചാണ് ദിലീപ് കോടതിയെ സമീപിച്ചിരുന്നു. കുറ്റപത്രം ചോര്ന്നത് സംബന്ധിച്ച് അന്വേഷണം നടത്തണമെന്ന് ദിലീപ് ഹര്ജിയില് ആവശ്യപ്പെട്ടിരുന്നു.
ഹര്ജി പരിഗണിച്ച കോടതി വിശദീകരണം നല്കാന് പോലീസിനോട് നിര്ദേശിച്ചിരുന്നു. ഈ സാഹചര്യത്തിലാണ് പോലീസ് വിശദമായ റിപ്പോര്ട്ട് ഇന്ന് കോടതിയില് സമര്പ്പിക്കുക.