ജലന്ധര്: ജലന്ധര് ബിഷപ്പ് ഫ്രാങ്കോ മുളയ്ക്കലിന് നോട്ടീസ് അയച്ചു. ഈ മാസം 19 ന് ബിഷപ്പ് അന്വേഷണസംഘത്തിന് മുമ്ബില് ഹാജരാകണമെന്നാണ് നിര്ദേശിച്ചിരിക്കുന്നത്. വൈക്കം ഡിവൈഎസ്പിയുടെ നേതൃത്വത്തില് ബിഷപ്പിനെ ചോദ്യം ചെയ്യും.
ജലന്ധര് ബിഷപ്പ് ഫ്രാങ്കോ മുളയ്ക്കലിനെതിരായ പീഡന പരാതിയില് അന്വേഷണ സംഘം ഇന്ന് ചേര്ന്ന യോഗത്തിലാണ് നോട്ടീസ് നല്കുവാന് തീരുമാനമായത്. കൊച്ചി റെയ്ഞ്ച് ഐ.ജി. വിജയ് സാഖറെയുടെ നേതൃത്വത്തില് കോട്ടയത്ത് വെച്ചായിരുന്നു യോഗം ചേര്ന്നത്.
ബിഷപ്പിനെതിരെ ശക്തമായ മൊഴികളും തെളിവുകളും ഉണ്ടെന്നാണ് അന്വേഷണ സംഘത്തിന്റെ കണ്ടെത്തല്. ഏറ്റുമാനൂരില്വച്ചായിരിക്കും ബിഷപ്പിനെ ചോദ്യം ചെയ്യുക എന്നാണ് സൂചന.രണ്ടാംഘട്ട അന്വേഷണത്തില് കന്യാസ്ത്രീയുടെയും ബിഷപ്പിന്റെയും മൊഴികളിലെ വൈരുധ്യങ്ങള് ഇല്ലാതായിട്ടുണ്ടെന്നും ചോദ്യം ചെയ്യലില് ബിഷപ്പ് അന്വേഷണസംഘത്തോട് പറഞ്ഞ കാര്യങ്ങള് തെറ്റാണെന്ന് കണ്ടെത്തിയതായും പൊലീസ് വൃത്തങ്ങള് പറയുന്നു.