പനാജി: കേന്ദ്രത്തില് അധികാരത്തിലെത്തിയാല് ഫിഷറീസ് വകുപ്പ് രൂപീകരിക്കുമെന്ന് കോണ്ഗ്രസ് അധ്യക്ഷന് രാഹുല് ഗാന്ധി. ഗോവയില് പരമ്ബരാഗത മത്സ്യത്തൊഴിലാളികളുമായുള്ള യോഗത്തിലാണ് രാഹുല് ഉറപ്പ് നല്കിയത്. കോണ്ഗ്രസിന്റെ തെരഞ്ഞെടുപ്പ് പ്രകടനപത്രികയില് ഫിഷറീസ് വകുപ്പ് രൂപീകരിക്കുമെന്ന പ്രഖ്യാപനവും ഉള്പ്പെടുത്തുമെന്നും അദ്ദേഹം പറഞ്ഞു.
വെള്ളിയാഴ്ചയാണ് രാഹുല് ഗാന്ധി ഗോവയിലെത്തിയത്. ശനിയാഴ്ച സംസ്ഥാനത്ത് ഒന്നിലേറെ യോഗങ്ങളില് അദ്ദേഹം പങ്കെടുക്കും. മത്സ്യമേഖലയ്ക്കു നീതി ഉറപ്പാക്കാന് കേന്ദ്രത്തില് പ്രത്യേക ഫിഷറീസ് മന്ത്രാലയം രൂപീകരിക്കുമെന്നു രാഹുല് പറഞ്ഞതായി ദേശീയ മത്സ്യത്തൊഴിലാളി ഫോറം ചെയര്പേഴ്സണ് ഒലന്സിയോ സിമിയോസ് അറിയിച്ചു.
നിലവില് കൃഷിമന്ത്രാലയമാണ് മത്സ്യമേഖലയിലെ വിഷയങ്ങള് കൈകാര്യം ചെയ്യുന്നത്. കൃഷി, സഹകരണം, കര്ഷകക്ഷേമം, മണ്ണ് സംരക്ഷണം തുടങ്ങിയ കാര്യങ്ങള്ക്ക് മുന്ഗണന നല്കുന്ന മന്ത്രാലയത്തിന്റെ അജന്ഡയില് മത്സ്യമേഖല കടന്നുവരിക അപൂര്വമാണ്. രാജ്യത്തെ മത്സ്യമേഖലയുടെ വികസനത്തിനായി ഫിഷറീസ് മന്ത്രാലയം രൂപീകരിക്കണമെന്ന് കേരളത്തിനൊപ്പം ആന്ധ്രപ്രദേശ്, ഗോവ, കര്ണാടകം, മഹാരാഷ്ട്ര, തമിഴ്നാട് തുടങ്ങിയ സംസ്ഥാനങ്ങളും നേരത്തെ ആവശ്യം ഉന്നയിച്ചിരുന്നു. കേന്ദ്രഭരണത്തിലുള്ള പുതുച്ചേരി സംസ്ഥാനവും ലക്ഷദ്വീപ്, ആന്തമാന് ആന്ഡ് നിക്കോബാര് ദ്വീപ് സമൂഹങ്ങളും ഈ ആവശ്യത്തെ പിന്തുണയ്ക്കുന്നുണ്ട്.