ന്യൂഡല്ഹി: എന്ഡിഎയെ വീണ്ടും തെരഞ്ഞെടുക്കാന് ബിഹാര് ഒരുങ്ങിക്കഴിഞ്ഞതായി പ്രധാനമന്ത്രി നരേന്ദ്ര മോദി. എന്ഡിഎ സര്ക്കാരിനെ വീണ്ടും തെരഞ്ഞെടുക്കാന് തയാറാണെന്ന് ബിഹാര് വ്യക്തമായ സന്ദേശം നല്കിക്കഴിഞ്ഞതായും അദ്ദേഹം പറഞ്ഞു. ബിഹാറിലെ അരാരിയയില് തെരഞ്ഞെടുപ്പ് റാലിയില് സംസാരിക്കുകയായിരുന്നു അദ്ദേഹം.
സംസ്ഥാനത്തെ പുതിയ ഉയരങ്ങളിലെത്തിക്കാന് ഇവിടത്തെ വോട്ടര്മാര് തീരുമാനിച്ചു കഴിഞ്ഞു. ഇരട്ട എന്ജിന് സര്ക്കാരിന്റെ തിരിച്ചുവരവ് സംസ്ഥാനത്തിന്റെ വികസനത്തെ വേഗത്തിലാക്കും. ചില ആളുകള്ക്ക് ഒരു പ്രശ്നമുണ്ട്, അവര് ചോദിക്കുന്നു “എന്തുകൊണ്ടാണ് മോദി തെരഞ്ഞെടുപ്പില് വിജയിക്കുന്നത്. എല്ലാ പാവപ്പെട്ട അമ്മമാരുടെയും സഹോദരിമാരുടെയും പ്രശ്നങ്ങള് പരിഹരിക്കാന് പ്രവര്ത്തിച്ചതിനാലാണ് മോദി തെരഞ്ഞെടുപ്പില് വിജയിക്കുന്നത്. അതുകൊണ്ടാണ് അവര് മോദിയെ അനുഗ്രഹിക്കുന്നത്. ഈ മകന് തന്റെ ജീവിതം ദരിദ്രര്ക്കായി സമര്പ്പിച്ചതാണെന്നും പ്രധാനമന്ത്രി പറഞ്ഞു.