കോഴിക്കോട്: മാണി സി. കാപ്പനെ എന്.സി.പിയില് നിന്ന് പുറത്താക്കിയതായി എന്.സി.പി കേന്ദ്ര നേതൃത്വം അറിയിച്ചു. പാര്ട്ടി വിരുദ്ധ പ്രവര്ത്തനത്തിനാണ് പുറത്താക്കിയതെന്നാണ് വിശദീകരണം.
കഴിഞ്ഞ ദിവസം മാണി സി. കാപ്പന് ഉള്പ്പെടെ എട്ട് നേതാക്കള് എന്.സി.പിയില് നിന്ന് രാജി വെച്ചിരുന്നു. പുതിയ പാര്ട്ടി രൂപീകരിക്കുമെന്നു പറഞ്ഞ മാണി സി. കാപ്പന് യു.ഡി.എഫിന്റെ ഘടകകക്ഷിയാകുമെന്നും പ്രഖ്യാപിച്ചു. ഇന്നലെ പാലായില് എത്തിയ കാപ്പന് രമേശ് ചെന്നിത്തല നയിക്കുന്ന ഐശ്വര്യ കേരള യാത്രയില് പ്രവര്ത്തകരോടൊപ്പം പങ്കെടുത്തിരുന്നു.
യു.ഡി.എഫ് പ്രവേശനത്തിനുശേഷം പാലായില് ചേര്ന്ന മാണി സി. കാപ്പന് വിഭാഗം പുതിയ പാര്ട്ടി രൂപവത്കരിക്കുന്നതിനായുള്ള നടപടിക്രമങ്ങള്ക്ക് തുടക്കംകുറിച്ചു. 28നകം എല്ലാ ജില്ല കമ്മിറ്റികളും പുനഃസംഘടിപ്പിക്കാന് യോഗം തീരുമാനിച്ചു. പുതിയ പാര്ട്ടിയുടെ ഭരണഘടന, പേര്, കൊടി, രജിസ്ട്രേഷന് എന്നിവയെക്കുറിച്ചു തീരുമാനിക്കാന് മാണി സി. കാപ്പന് ചെയര്മാനും അഡ്വ. ബാബു കാര്ത്തികേയന് കണ്വീനറുമായി പത്തംഗസമിതിയെ ചുമതലപ്പെടുത്തി.