ന്യൂഡല്‍ഹി: കോണ്‍ഗ്രസില്‍ സോണിയ, രാഹുല്‍, പ്രിയങ്ക എന്നിവര്‍ പാര്‍ട്ടി അധ്യക്ഷപദവിയിലേക്കില്ലെന്ന് ആവര്‍ത്തിച്ചു വ്യക്തമാക്കിയ സാഹചര്യത്തിലാണ് രാഹുലിന്‍റെ വിശ്വസ്തനെ എഐസിസി അധ്യക്ഷപദവിയിലെത്തിച്ചു പിന്നാന്പുറത്തു നിയന്ത്രണം തുടരാനുള്ള ശ്രമം.
അശോക് ഗെഹ്‌ലോട്ട്, മല്ലികാര്‍ജുന്‍ ഖാര്‍ഗെ എന്നിവര്‍ക്കു പുറമെ താരതമ്യേന പ്രായക്കുറവുള്ള പുതിയ പേരുകളും പാര്‍ട്ടി അധ്യക്ഷസ്ഥാനത്തേക്ക് നേതൃത്വം പരിഗണിച്ചേക്കും.
സോണിയഗാന്ധി തുടര്‍ച്ചയായ 18 വര്‍ഷക്കാലം കോണ്‍ഗ്രസ് അധ്യക്ഷയായ ശേഷം 2017ല്‍ മകന്‍ രാഹുല്‍ ഗാന്ധിയെ എതിരില്ലാതെ പ്രസിഡന്‍റാക്കിയിരുന്നു.
2019ലെ തെരഞ്ഞെടുപ്പു തോല്‍വിയെ തുടര്‍ന്ന് രാഹുല്‍ പദവി ഒഴിഞ്ഞതോടെയാണ് കോണ്‍ഗ്രസ് പ്രതിസന്ധിയിലായത്. രാഹുല്‍ ഒഴിഞ്ഞെങ്കിലും പകരം പുതിയ പ്രസിഡന്‍റിനെ തെരഞ്ഞെടുക്കാതെ മൂന്നു വര്‍ഷമായി സോണിയ താത്കാലിക അധ്യക്ഷയായി തുടരുന്നു. എഐസിസി ജനറല്‍ സെക്രട്ടറി പദവി പോലും ഇല്ലെങ്കിലും രാഹുല്‍ തന്നെയാണു പാര്‍ട്ടിയിലെ പ്രധാന തീരുമാനങ്ങളെടുക്കുന്നതെന്നു ഹൈക്കമാന്‍ഡ് സമ്മതിക്കുന്നു.
ഇതിനിടെയാണ് 2000ത്തിനുശേഷം ആദ്യമായി എഐസിസി പ്രസിഡന്‍റു പദവിയിലേക്ക് തെരഞ്ഞെടുപ്പു പ്രഖ്യാപിച്ചത്. വോട്ടര്‍പട്ടിക പ്രസിദ്ധീകരിക്കണം എന്നാവശ്യപ്പെട്ട് ശശി തരൂരിന്‍റെ നേതൃത്വത്തില്‍ അഞ്ച് എംപിമാര്‍ കത്തെഴുതിയതോടെ വിവാദം ശക്തമായി. തെരഞ്ഞെടുപ്പു പ്രക്രിയ സുതാര്യവും നീതിപൂര്‍വകം ആകണമെന്നാവശ്യപ്പെട്ട് തെരഞ്ഞെടുപ്പ് അഥോറിറ്റി ചെയര്‍മാന്‍ മധുസൂദന്‍ മിസ്ത്രിക്ക് തരൂരും മനീഷ് തിവാരിയും കത്തെഴുതിയതും വാര്‍ത്തയായി.
രാഹുലോ, സോണിയ നിര്‍ദേശിക്കുന്ന നേതാവോ അല്ലെങ്കില്‍ പ്രസിഡന്‍റു പദവിയിലേക്കു മത്സരിച്ചേക്കുമെന്ന് ജി-23 ഗ്രൂപ്പിലെ അംഗമായ തരൂര്‍ സൂചന നല്‍കിയിരുന്നു. എന്നാല്‍ പിസിസികളോട് പ്രമേയം പാസാക്കാനുള്ള പുതിയ നിര്‍ദേശം പാര്‍ട്ടിയിലെ പ്രതിസന്ധി രൂക്ഷമാക്കും. ഈ മാസം 24 മുതല്‍ 30 വരെയാണ് എഐസിസി പ്രസിഡന്‍റുസ്ഥാനത്തേക്കുള്ള പത്രികാ സമര്‍പ്പണത്തിനുള്ള സമയം. ഒക്ടോബര്‍ 17 നാണ് വോട്ടെടുപ്പ്. ഇരുപതാം തീയതി മുതല്‍ 9,000 പ്രതിനിധികള്‍ വരുന്ന വോട്ടര്‍പട്ടിക കേന്ദ്ര തെരഞ്ഞെടുപ്പു അഥോറിറ്റി ഓഫീസിലും പിസിസികളിലും പരിശോധിക്കാമെന്നു മിസ്ത്രി അറിയിച്ചു.