തിരുവനന്തപുരം • സമരത്തില് മുഖ്യമന്ത്രിക്കൊപ്പം മന്ത്രിമാരും പങ്കെടുക്കും. ശനിയാഴ്ച മൂന്നു മണിക്ക് വിഷയത്തില് സര്വകക്ഷി യോഗവും ചേരും. പ്രതിപക്ഷ പാര്ട്ടി നേതാക്കളടക്കം പങ്കെടുക്കുന്ന യോഗത്തില് ഭാവി സമര പരിപാടികള് ചര്ച്ച ചെയ്യും. ബിജെപിയേയും യോഗത്തിലേക്ക് ക്ഷണിക്കുന്നുണ്ടെന്ന് മുഖ്യമന്ത്രി തിരുവനന്തപുരത്ത് വാര്ത്താ സമ്മേളനത്തില് അറിയിച്ചു. സംസ്ഥാന സര്ക്കാറുകളുടെ കീഴില് പ്രവര്ത്തിക്കുന്ന സഹകരണ മേഖലയെ തകര്ക്കാനാണ് കേന്ദ്രത്തിന്റെ നീക്കമെന്ന് മുഖ്യമന്ത്രി ആരോപിച്ചു.
ജില്ലാ സഹകരണ ബാങ്കുകള്ക്കും പ്രാഥമിക സഹകരണ ബാങ്കുകള്ക്കും നോട്ടുകള് മാറ്റിനല്കുന്നത് ഉള്പ്പെടെയുള്ള സേവനങ്ങള് നിഷേധിച്ചതിനെതിരെ വ്യാപകമായ പ്രതിഷേധം ഉയര്ന്നിട്ടുണ്ട്. സഹകരണ ബാങ്കുകളെ തകര്ക്കാനുള്ള ബോധപൂര്വമായ നീക്കമാണ് കേന്ദ്രത്തിന്റേതെന്നും ഇതിനു പിന്നില് വ്യക്തമായ രാഷ്ട്രീയ ഗൂഢാലോചനയുണ്ടെന്നു സംശയിക്കുന്നതായും മുഖ്യമന്ത്രി പിണറായി വിജയന് നേരത്തെ ആരോപിച്ചിരുന്നു.
സഹകരണ മേഖലയെ തകര്ക്കാനുള്ള ശ്രമത്തെ ഒറ്റക്കെട്ടായി എതിര്ക്കാന് തയാറാണെന്ന് പ്രതിപക്ഷ നേതാവ് രമേശ് ചെന്നിത്തല വ്യക്തമാക്കിയിട്ടുണ്ട്. സഹകരണ ബാങ്കുകളുടെ പ്രശ്നത്തില് എല്ഡിഎഫുമായി ചേര്ന്ന് പ്രക്ഷോഭത്തിന് ആലോചനയുണ്ട്. ബിജെപിയുടെ നീക്കങ്ങളെ ഒറ്റക്കെട്ടായി എതിര്ക്കും. നോട്ട് പ്രതിസന്ധിയില് അടിയന്തര നിയമസഭാ സമ്മേളനം വിളിച്ചുചേര്ക്കണം. ജനങ്ങള്ക്ക് ദുരിതം അറിയിക്കാന് സെക്രട്ടേറിയറ്റില് കണ്ട്രോള് റൂം തുറക്കണമെന്നും ചെന്നിത്തല ആവശ്യപ്പെട്ടു.