ന്യൂഡല്ഹി: പഞ്ചാബ് നാഷണല് ബാങ്ക് തട്ടിപ്പ് കേസില് കേന്ദ്ര സര്ക്കാരിനെതിരെ ആഞ്ഞടിച്ച് കോണ്ഗ്രസ്. സാധാരണക്കാരുടെ പണം കൊള്ളയടിച്ചതില് പ്രധാനമന്ത്രിയുടെ ഒാഫീസിനും ധനമന്ത്രാലയത്തിനും ഉത്തരവാദിത്തമില്ലാത്ത അവസ്ഥയാണെന്ന് കോണ്ഗ്രസ് വക്താവ് കപില് സിബല് ആരോപിച്ചു.
സാമ്ബത്തിക തട്ടിപ്പ് വിവരം പ്രധാനമന്ത്രി നരേന്ദ്ര മോദി നേരത്തെ അറിഞ്ഞിരുന്നു. പ്രധാനമന്ത്രിയുടെ ഒാഫിസിന് 2017 ജൂലൈയില് പരാതി ലഭിച്ചിരുന്നു. തട്ടിപ്പ് അറിഞ്ഞിട്ടും പ്രധാനമന്ത്രി നടപടി സ്വീകരിച്ചില്ലെന്നും കപില് സിബല് മാധ്യമങ്ങളോട് പറഞ്ഞു.
ഔദ്യോഗിക വിദേശ യാത്രകളില് ഒപ്പമുണ്ടായിരുന്നവരുടെ വിശദാംശങ്ങള് എന്തു കൊണ്ട് പ്രധാനമന്ത്രി പുറത്തുവിടുന്നില്ലെന്ന് സിബല് ചോദിച്ചു. ഇത്ര ലാഘവത്തോടെയാണ് പ്രധാനമന്ത്രി കാര്യങ്ങള് കൈകാര്യം ചെയ്യുന്നതെന്നും കപില് സിബല് ചൂണ്ടിക്കാട്ടി.