തിരുവനന്തപുരം : ചിഹ്നത്തിന്റെ പേരില് അടിച്ചേല്പ്പിക്കുന്ന ദേശീയത ഐക്യത്തിന് വഴിവെക്കില്ലെന്ന് മുഖ്യമന്ത്രി പിണറായി വിജയന്. സംസ്ഥാനത്തെ സ്വാതന്ത്ര്യ ദിനാഘോഷങ്ങള് തിരുവനന്തപുരം സെന്ട്രല് സ്റ്റേഡിയത്തില് ദേശീയ പതാക ഉയര്ത്തി നിര്വഹിക്കുകയായിരുന്നു മുഖ്യമന്ത്രി.
ഗോരഖ്പുര് ദുരന്തത്തില് ആദരാഞ്ജലി അര്പ്പിച്ചുകൊണ്ടാണ് അദ്ദേഹം സംസാരിച്ചു തുടങ്ങിയത്. ദേശീയതയില് വിഷമോ വെളളമോ ചേര്ക്കാനുള്ള ശ്രമങ്ങള് ചെറുക്കേണ്ടതാണെന്നും ക്രമസമാധാനം, സ്ത്രീസുരക്ഷ, ലിംഗനീതി ഈ മേഖലകളില് സര്ക്കാരിനു വിട്ടുവീഴ്ചയില്ലെന്നും മുഖ്യമന്ത്രി കൂട്ടിച്ചേര്ത്തു.
വിവിധ സേനാ വിഭാഗങ്ങളുടെയും, അശ്വാരൂഡ സേന, എന്സിസി,സ്റ്റുഡന്റസ് പോലീസ് കേഡറ്റുകള് തുടങ്ങിയവരുടെയും ആഭിവാദ്യം സ്വീകരിച്ചു. രാഷ്ട്രപതിയുടെ പൊലീസ് മെഡലുകള്, മുഖ്യമന്ത്രിയുടെ പൊലീസ് മെഡലുകള് എന്നിവയുടെ വിതരണവും നടന്നു.