ന്യൂഡല്ഹി: ഇന്ത്യയിലെത്തി വിദഗ്ധ ചികിത്സ നേടാനായി മെഡിക്കല് വിസക്ക് അപേക്ഷ നല്കി കാത്തിരിക്കുന്ന പാകിസ്താന് പൗരന്മാര്ക്ക് കേന്ദ്ര വിദേശകാര്യ മന്ത്രി സുഷമ സ്വരാജിന്റെ സ്വാതന്ത്ര്യദിന സമ്മാനം. അപേക്ഷ നല്കി കാത്തിരിക്കുന്ന എല്ലാ പാക് പൗരന്മാര്ക്കും മെഡിക്കല് വിസ ഉടന് അനുവദിക്കുമെന്ന് സുഷമ സ്വരാജ് ട്വിറ്ററിലൂടെ അറിയിച്ചു.
പാക് പൗരന്മാര്ക്ക് മെഡിക്കല് വിസ അനുവദിക്കുന്നതിന് അവിടുത്തെ വിദേശകാര്യ മന്ത്രിയുടെ അനുമതി ആവശ്യമാണ്. അനുമതി നേടുന്നതില് വന്ന കാലതാമസമാണ് വിസ വൈകാന് കാരണമെന്നും സുഷമ വ്യക്തമാക്കി.
പാക് ജയിലില് കഴിയുന്ന മുന് ഇന്ത്യന് നാവിക ഉദ്യോഗസ്ഥന് കുല്ഭൂഷന് ജാദവിനെ കാണാന് അമ്മക്ക് വിസ അനുവദിക്കാന് സര്താജ് അസീസ് കാലതാമസം വരുത്തിയിരുന്നു. ഇതേതുടര്ന്നാണ് പാക് പൗരന്മാര്ക്ക് മെഡിക്കല് വിസ അനുവദിക്കുന്ന നിയമം ഇന്ത്യ കര്ശനമാക്കിയത്.