കൊച്ചി: വാളയാര് കേസ് അന്വേഷണം അനിശ്ചിതമായി നീട്ടിക്കൊണ്ടുപോകാനാകില്ലെന്ന് ഹൈക്കോടതി. കേസ് ഏറ്റെടുക്കാന് തയാറാണോയെന്ന് പത്ത് ദിവസത്തിനുളളില് സിബിഐ വ്യക്തമാക്കണമെന്നും കോടതി പറഞ്ഞു. വാളയാര് പെണ്കുട്ടികളുടെ അമ്മ സമര്പ്പിച്ച ഹര്ജിയിലാണ് സിംഗിള് ബെഞ്ചിന്റെ നിര്ദേശം. പാലക്കാട് വാളയാറില് രണ്ട് പെണ്കുട്ടിളെ തൂങ്ങി മരിച്ച നിലയില് കാണപ്പെട്ട സംഭവത്തില് സംസ്ഥാന സര്ക്കാര് നേരത്തെ സിബിഐ അന്വേഷണം പ്രഖ്യാപിച്ചിരുന്നു. എന്നാല് ഹൈക്കോടതി മേല്നോട്ടത്തില് അന്വേഷണം വേണമെന്ന് ആവശ്യപ്പെട്ട് പെണ്കുട്ടികളുടെ അമ്മ ഹൈക്കോടതിയെ സമീപിച്ചു.
നേരത്തെ കേസിലെ പ്രതികളെ വെറുതെവിട്ട വിചാരണക്കോടതി നടപടി ഹൈക്കോടതി റദ്ദാക്കിയിരിന്നു. സര്ക്കാരിന്റെയും കുട്ടികളുടെ അമ്മയുടെയും അപ്പീല് അംഗീകരിച്ചായിരുന്നു നടപടി. പിന്നാലെ കേസില് തുടരന്വേഷണത്തിന് പാലക്കാട് പോക്സോ കോടതി ഉത്തരവിടുകയും ചെയ്തു.