പി.സി ജോര്ജിന്റെ ജാമ്യാപേക്ഷയ്ക്ക് പ്രത്യേക പരിഗണനയില്ലെന്നും മറ്റുകേസുകള്ക്ക് ശേഷം പരിഗണിക്കാമെന്നും ഹൈക്കോടതി.
പി.സിയുടെ ജാമ്യാപേക്ഷ ഇന്നു തന്നെ പരിഗണിക്കുമെന്നും കോടിതി വ്യക്തമാക്കി. അനന്തപുരി ഹിന്ദു മഹാസമ്മേളനത്തിലെ വിദ്വേഷ പ്രസംഗത്തില് പി.സി ജോര്ജിനെ 14 ദിവസത്തേക്ക് റിമാന്ഡ് ചെയ്തതിനു പിന്നാലെയാണ് ഹൈക്കോടതിയുടെ പരാമര്ശം. പി.സി ജോര്ജ് ഹൈക്കോടതിയില് സമര്പ്പിച്ച ജാമ്യാപേക്ഷ ഇന്ന് രാവിലെ 10.15 ന് പരിഗണിക്കുമെന്ന വിവരമാണ് ലഭിച്ചിരുന്നത്.
തിരുവനന്തപുരം ഒന്നാം ക്ലാസ് മജിസ്ട്രേറ്റ് കോടതിയാണ് പിസി ജോര്ജിനെ റിമാന്ഡ് ചെയ്തത്. പി.സി ജോര്ജിന്റേത് രാവിലെ ആദ്യ കേസായി പരിഗണിക്കണമെന്നായിരുന്നു അഭിഭാഷകന് കോടതിയില് ആവശ്യപ്പെട്ടത്. ജസ്റ്റിസ് പി ഗോപിനാഥ് പിസിയുടെ ജാമ്യാപേക്ഷയ്ക്ക് പ്രത്യേക പരിഗണന നല്കാനാവില്ലെന്ന് കോടതിയില് വ്യക്തമാക്കുകയായിരുന്നു. മറ്റ് ജാമ്യാപേക്ഷകള് സാധാരണ നിലയില് ലിസ്റ്റ് ചെയ്തിട്ടുണ്ട്. 40 ജാമ്യാപേക്ഷ കേസുകള് ഹൈക്കോടതിക്ക് ഇന്ന് പരിഗണിക്കേണ്ടതുണ്ട്. അതുകൊണ്ടു തന്നെ നാല്പത്തിയൊന്നാമത്തെ കേസായിട്ടായിരിക്കും പി.സി ജോര്ജിന്റെ ജാമ്യാപേക്ഷ പരിഗണിക്കുക. ഉച്ചയോടു കൂടി പിസി ജോര്ജിന്റെ ജാമ്യപേക്ഷ പരിഗണിക്കുമെന്നാണ് കരുതുന്നത്.