റിയാദ്: ജമാല് ഖഷോഗി വധത്തില് യുഎസ് സെനറ്റ് പാസാക്കിയ പ്രമേയം സൗദിയുടെ ആഭ്യന്തരകാര്യത്തിലുള്ള ഇടപെടലാണെന്നും അതിനാല്ത്തന്നെ തള്ളിക്കളയുകയാണെന്നും സൗദി അറേബ്യ. സൗദി കിരീടാവകാശി മുഹമ്മദ് ബിന് സല്മാന്(എംബിഎസ്) രാജകുമാരനെ കുറ്റപ്പെടുത്തുന്നതായിരുന്നു ഭരണ, പ്രതിപക്ഷ കക്ഷികള് അംഗീകരിച്ച പ്രമേയം. യെമനില് സൗദി നടത്തുന്ന യുദ്ധത്തിന് അമേരിക്ക സഹായം നല്കരുതെന്നു സെനറ്റ് മറ്റൊരു പ്രമേയത്തില് ആവശ്യപ്പെട്ടു.
സൗദിയുടെ ഭരണത്തിലും ആഭ്യന്തര കാര്യങ്ങളിലും അനാവശ്യമായി കൈകടത്തുന്നതാണ് പ്രമേയമെന്നു സൗദി അധികൃതര് പ്രതികരിച്ചു. പ്രമേയത്തിലെ ആരോപണങ്ങള്ക്കു തെളിവില്ല. സൗദി നേതൃത്വത്തെ അവഹേളിക്കുന്ന ഒരു നടപടിയും അംഗീകരിക്കില്ലെന്നും കൂട്ടിച്ചേര്ത്തു. സെനറ്റ് പാസാക്കിയ പ്രമേയം പ്രസിഡന്റ് ട്രംപിനു കനത്ത തിരിച്ചടിയാണ്. ജനപ്രതിനിധിസഭ കൂടി പാസാക്കാതെ പ്രമേയം നിയമമാവില്ല. പ്രതിനിധി സഭ പാസാക്കിയാലും പ്രസിഡന്റിനു വീറ്റോ ചെയ്യാം. ഖഷോഗിക്ക് എതിരേ സെനറ്റ് പ്രമേയം പാസാക്കിയതിനു പിറ്റേന്നു തന്നെ യുഎസ് സ്റ്റേറ്റ് സെക്രട്ടറി മൈക്ക് പോംപിയോ യുഎസ് -സൗദി സഖ്യത്തെ ന്യായീകരിച്ചു പ്രസ്താവന പുറപ്പെടുവിച്ചുവെന്നതും ശ്രദ്ധേയമാണ്.