ന്യൂഡല്ഹി: ബിജെപിയെ പ്രതിരോധിക്കാന് 52 എംപിമാര് തന്നെ അധികമാണെന്ന് രാഹുല് ഗാന്ധി. കോണ്ഗ്രസിന്റെ 52 എംപിമാര് ബിജെപിക്കെതിരെ ഓരോ ഇഞ്ചിലും പോരാടുമെന്നും അദ്ദേഹം പറഞ്ഞു. കോണ്ഗ്രസ് സംയുക്ത പാര്ലമെന്ററി പാര്ട്ടി യോഗത്തില് എംപിമാരോടു സംസാരിക്കുകയായിരുന്നു രാഹുല്.
‘ആത്മപരിശോധനയ്ക്കും പുനരുജ്ജീവനത്തിനുമുള്ള സമയമാണിത്. അധിക്ഷേപവും വെറുപ്പും വിദ്വേഷവും നേരിടേണ്ടി വന്നേക്കാം. അത് ആസ്വദിച്ച് ഭരണഘടന സംരക്ഷിക്കാന് മുന്നോട്ടു പോകണമെന്നും എംപിമാര്ക്ക് ധൈര്യം പകര്ന്ന് രാഹുല് ഗാന്ധി പറഞ്ഞു. സെന്ട്രല് ഹാളില് കോണ്ഗ്ര സംയുക്ത പാര്ലമെന്ററി പാര്ട്ടി യോഗം ഇപ്പോഴും തുടരുകയാണ്. സോണിയാ ഗാന്ധിയെ സംയുക്ത പാര്ലമെന്ററി പാര്ട്ടി അധ്യക്ഷയായി തെരഞ്ഞെടുത്തിരുന്നു. മുന് പ്രധാനമന്ത്രിയും മുതിര്ന്ന നേതാവുമായ മന്മോഹന്സിംഗാണ് സോണിയയുടെ പേര് അധ്യക്ഷസ്ഥാനത്തേക്ക് നിര്ദേശിച്ചത്.
ലോക്സഭാ കക്ഷി നേതാവായി രാഹുല് ഗാന്ധി വരണമെന്നാണ് കേരളത്തിലെ എംപിമാര് ഉള്പ്പടെ ആവശ്യം ഉന്നയിക്കുന്നത്. എന്നാല് സ്ഥാനം ഏറ്റെടുക്കുന്ന കാര്യത്തില് രാഹുലിന്റെ തീരുമാനം ഉറപ്പായിട്ടില്ല .സോണിയ ഗാന്ധിയാകും ലോക്സഭാ കക്ഷി നേതാവിനേയും രാജ്യസഭാ കക്ഷി നേതാവിനേയും തീരുമാനിക്കുക. സ്ഥാനം ഏറ്റെടുക്കാന് രാഹുല് പിന്മാറിയല് ശശി തരൂര്, മനീഷ് തിവാരി, അധീര് രഞ്ജന് ചൗധരി തുടങ്ങിയവര്ക്ക് സാധ്യത ഏറുന്നുണ്ട് .