ന്യൂഡല്ഹി: കള്ളപ്പണം വെളുപ്പിക്കല് കേസില് പോപുലര് ഫ്രണ്ടിനും അവരുടെ വിദ്യാര്ഥി വിഭാഗമായ കാമ്ബസ് ഫ്രണ്ടിനുമെതിരെ കുറ്റപത്രം സമര്പ്പിച്ച് എന്ഫോഴ്സ്മെന്റ് ഡയറക്ടറേറ്റ് (ഇ.ഡി) . ലഖ്നോ പ്രത്യേക കോടതിയിലാണ് ഇ.ഡി ആദ്യ കുറ്റപത്രം സമര്പ്പിച്ചത് . മാധ്യമപ്രവര്ത്തകന് സിദ്ദീഖ് കാപ്പന്റെ പേരും കുറ്റപത്രത്തിലുണ്ട്.
2020 ല് രാജ്യത്തെ ഞെട്ടിച്ച ഹാഥറസ് കൂട്ടബലാത്സംഗത്തിനുശേഷം സംഘടന അംഗങ്ങള് വര്ഗീയ കലാപത്തിനും ഭീകരതക്കും വഴിമരുന്നിടാന് ശ്രമിച്ചെന്ന് ഇതില് ആരോപിച്ചു. കഴിഞ്ഞ വര്ഷം ഡല്ഹിയില് പൗരത്വഭേദഗതി നിയമത്തിനെതിരെ നടന്ന സമരത്തിനായുള്ള ധനസമാഹരണത്തില് പോപുലര് ഫ്രണ്ടിന്റെ പങ്ക് ഇ.ഡി അന്വേഷിക്കുന്നുണ്ട്.
കാമ്ബസ് ഫ്രണ്ട് ദേശീയ ജനറല് സെക്രട്ടറി കെ.എ. റഊഫ് ശരീഫ്, ട്രഷറര് അതീഖുറഹ്മാന്, സിദ്ദീഖ് കാപ്പന്, ഡല്ഹി കാമ്ബസ് ഫ്രണ്ട് ജന. സെക്രട്ടറി മസൂദ് അഹ്മദ്, മുഹമ്മദ് ആലം, എന്നിവരുടെ പേരാണ് കുറ്റപത്രത്തിലുള്ളത്. കുറ്റാരോപിതരായ അഞ്ചുപേരും മാര്ച്ച് 18ന് ഹാജരാകണമെന്ന് കാണിച്ച് കോടതി സമന്സ് അയച്ചു.