കൊച്ചി: പൗരത്വ ഭേദഗതി നിയമത്തിനെതിരായ പ്രക്ഷോഭങ്ങളില് സിപിഎമ്മുമായി സഹകരിക്കാനില്ലെന്ന് കെപിസിസി അധ്യക്ഷന് മുല്ലപ്പള്ളി രാമചന്ദ്രന്. സിപിഎമ്മുമായി സഹകരിച്ച് സമരത്തിനില്ലെന്ന് താന് നേരത്തെ തന്നെ അസന്നിഗ്ദമായി പ്രഖ്യാപിച്ചിട്ടുള്ളതാണ്. ഇക്കാര്യത്തില് കോണ്ഗ്രസിനുള്ളില് അഭിപ്രായ ഭിന്നതയൊന്നും ഇല്ലെന്നും മുല്ലപ്പള്ളി കൊച്ചിയില് പറഞ്ഞു. യുഡിഎഫ് യോഗത്തില് പങ്കെടുക്കാന് എത്തിയപ്പോഴാണ് മുല്ലപ്പള്ളിയുടെ പ്രതികരണം.
ഫാസിസ്റ്റ് നയങ്ങള്ക്കെതിരെ കോണ്ഗ്രസിന് എന്നും വ്യക്തമായ നിലപാടുണ്ടെന്നും ന്യൂനപക്ഷങ്ങളെ വോട്ട് ബാങ്കായി കാണുക മാത്രമാണ് സിപിഎം എല്ലാക്കാലത്തും ചെയ്തിട്ടുള്ളതെന്നും മുല്ലപ്പള്ളി പറഞ്ഞു. എല്ഡിഎഫുമായി ചേര്ന്ന് സമരമില്ലെന്നും യുഡിഎഫ് സ്വന്തം നിലയില് സമരപരിപാടികളുമായി മുന്നോട്ടു പോകുമെന്നും യുഡിഎഫ് കണ്വീനര് ബെന്നി ബഹനാനും വ്യക്തമാക്കി.
പൗരത്വ നിയമ ഭേദഗതിക്കെതിരായ പ്രവര്ത്തനങ്ങളില് ഒറ്റയ്ക്കും കൂട്ടായും സമരങ്ങള് വേണ്ടിവരുമെന്ന് മുസ്ലിം ലീഗ് നേതാവ് പി.കെ. കുഞ്ഞാലിക്കുട്ടി എംപി അഭിപ്രായപ്പെട്ടു. ഇതൊരു പൊതുവിഷയമായതിനാല് രാജ്യവ്യാപകസമരം നടത്തേണ്ടതുണ്ട്. അതേസമയം, എല്ഡിഎഫുമായി ചേര്ന്നു വീണ്ടും സമരം നടത്തുമോയെന്ന ചോദ്യത്തിന് അദ്ദേഹം ഉത്തരം നല്കിയില്ല.