ന്യൂഡല്ഹി : വിവാഹിതനാണെന്ന വിവരം മറച്ചുവെച്ച് കാമുകിക്കൊപ്പം യുവാവ് ആഴ്ചയില് മൂന്നുദിവസം ഭാര്യയോടൊപ്പവും മൂന്നുദിവസം കാമുകിക്കൊപ്പവും കഴിയണമെന്ന് പോലീസിന്റെ നിര്ദേശം . ആഴ്ചയില് ഒരു ദിവസം അവധിയും പോലീസ് അനുവദിച്ചുനല്കി. എന്നാല് അതിനു പിന്നാലെ .പീഡനപരാതിയുമായി കാമുകി രംഗത്തെത്തി.
ജാര്ഖണ്ഡിലാണ് സംഭവം. റാഞ്ചിയിലെ കോകര് സ്വദേശിയായ രാജേഷ് മഹതോ നേരത്തേ വിവാഹിതനായിരുന്നു . എന്നാല് ഇടക്കാലത്ത് വച്ച് യുവാവ് ഒരു പെണ്കുട്ടിയുമായി പ്രണയത്തിലായി. പെണ്കുട്ടിയോട് യുവാവ് തനിക്ക് ഭാര്യയും കുട്ടിയും ഉണ്ടെന്ന കാര്യം പറഞ്ഞിരുന്നില്ല . വിവാഹിതനല്ലെന്നായിരുന്നു പെണ്കുട്ടിയെ ധരിപ്പിച്ചിരുന്നത്. പിന്നീട് ഭാര്യയെയും കുട്ടിയെയും ഉപേക്ഷിച്ച് പെണ്കുട്ടിക്കൊപ്പം യുവാവ് താമസം മാറ്റി.
ഭര്ത്താവിനെ കാണാതായതോടെ ഭാര്യ പോലീസില് പരാതി നല്കി . ഭാര്യക്ക് പിന്നാലെ കാമുകിയായ പെണ്കുട്ടിയുടെ കുടുംബം യുവതിയെ തട്ടിക്കൊണ്ടുപോയതായി കാട്ടി യുവാവിനെതിരെ പരാതിയുമായെത്തി. രണ്ടുപേരുടെയും പരാതിയുടെ അടിസ്ഥാനത്തില് പോലീസ് ഒരു കാര്യം കണ്ടെത്തി രണ്ടിലും ‘ പ്രതി ‘ സ്ഥാനത്ത് ഒരാള് തന്നെ.
തുടര്ന്ന് നടത്തിയ തിരച്ചിലില് രാജേഷിനെയും പെണ്കുട്ടിയെയും കണ്ടെത്തി. എന്നാല് ഒളിച്ചോടിയ സമയത്തുതന്നെ പെണ്കുട്ടിയെ രാജേഷ് വിവാഹം കഴിച്ചിരുന്നു. ഇരുവരെയും സ്റ്റേഷനില് എത്തിച്ചു . സ്റ്റേഷനില് രാജേഷും ഭാര്യയും പെണ്കുട്ടിയും കുടുംബവുമെത്തിയതോടെ പരസ്പരം കലഹിക്കാന് തുടങ്ങി.
ഇതോടെ പോലീസ് പരിഹാര നിര്ദേശം മുന്നോട്ടുവെക്കുകയായിരുന്നു. മൂന്നുദിവസം രാജേഷ് ഭാര്യക്കൊപ്പം കഴിയണം. മൂന്നുദിവസം കാമുകിക്കൊപ്പവും. ആഴ്ചയില് ഒരു ദിവസം അവധിയെടുക്കുകയും ചെയ്യാം. പോലീസ് മുന്നോട്ടുവെച്ച നിര്ദേശം അംഗീകരിച്ച് മൂന്നുപേരും കരാറില് ഒപ്പിടുകയും ചെയ്തു.
ഇതിനു പിന്നാലെയാണ് കാമുകി പീഡന പരാതി നല്കിയത് . സംഭവത്തില് എഫ്.ഐ.ആര് രജിസ്റ്റര് ചെയ്ത പോലീസ് രാജേഷിനെതിരെ അറസ്റ്റ് വാറന്റ് പുറപ്പെടുവിച്ചു. ഇയാള് ഇപ്പോള് ഒളിവിലാണ്.