തിരുവനനന്തപുരം: സംസ്ഥാനത്ത് കോവിഡ് വ്യാപനത്തിന്റെ ഘട്ടമാണ്. ഈ സാഹചര്യത്തില് ആരാധനാലയങ്ങളിലും കര്ശനമായ നിയന്ത്രണങ്ങള് ആവശ്യമുണ്ടെന്ന് മുഖ്യമന്ത്രി പിണറായി വിജയന് പത്ര സമ്മേളനത്തില് പറഞ്ഞു.
റമദാന് കാലമായതുകൊണ്ട് പള്ളികളില് പൊതുവെ ആളുകള് കൂടാന് സാധ്യതയുണ്ട്. ഇന്നത്തെ സാഹചര്യത്തില് പരമാവധി 50 പേരെ മാത്രമേ പങ്കെടുപ്പിക്കാന് പാടുള്ളു. ചെറിയ പള്ളികളാണെങ്കില് എണ്ണം ഇതിലും ചുരുക്കേണ്ടിവരുമെന്ന് മുഖ്യമന്ത്രി പറഞ്ഞു.
നമസ്കരിക്കാന് പോകുന്നവര് പായ സ്വന്തമായി കൊണ്ടുപോകുന്നതാണ് നല്ലത്. ദേഹശുദ്ധിവരുത്തുന്നതിന് ടാങ്കിലെ വെള്ളത്തിനു പകരം പൈപ്പ് വെള്ളം ഉപയോഗിക്കണം. പല പള്ളികളും ഇത്തരം നിയന്ത്രണങ്ങള് നേരത്തെ തന്നെ പാലിച്ചിട്ടുണ്ട്. ആരാധനാലയങ്ങളില് ഭക്ഷണവും തീര്ത്ഥവും നല്കുന്ന സമ്ബ്രദായം തല്ക്കാലത്തേക്ക് ഒഴിവാക്കണമെന്നും പിണറായി പറഞ്ഞു. കൂടാതെ ജില്ലാകളക്ടര്മാര് അതാതിടത്തെ മതനേതാക്കളുമായി ആലോചിച്ച് ഇക്കാര്യത്തില് തീരുമാനമെടുക്കണമെന്നും അദ്ദേഹം വ്യക്തമാക്കി .
എല്ലാവിധ ആള്ക്കൂട്ടങ്ങളും കൂടിച്ചേരലുകളും ഒഴിവാക്കുക എന്നതാണ് രോഗവ്യാപനം തടയാനുള്ള മാര്ഗ്ഗങ്ങളില് ഏറ്റവും പ്രധാനമെന്നും മുഖ്യമന്ത്രി പറഞ്ഞു.