കണ്ണൂര്: കേരളത്തിന്റെ ഉത്പാദനോന്മുഖവും വികസനോന്മുഖവുമായ മുന്നേറ്റത്തില് തൊഴില് സഭ വലിയ പങ്ക് വഹിക്കുമെന്ന് മുഖ്യമന്ത്രി പിണറായി വിജയന്.
പിണറായി കണ്വന്ഷന് സെന്ററില് തൊഴില്സഭയുടെ സംസ്ഥാനതല ഉദ്ഘാടനം നിര്വഹിച്ച് പ്രസംഗിക്കുകയായിരുന്നു അദ്ദേഹം.
തൊഴില് സുരക്ഷ ഉറപ്പുവരുത്തുകയെന്ന സര്ക്കാരിന്റെ നിലപാടിന്റെ തുടര്ച്ചയാണ് തൊഴില് സഭ. തൊഴില് നല്കുന്നതിനുള്ള ഏറ്റവും പ്രധാന പദ്ധതിക്കാണു തുടക്കമാകുന്നത്. പുതിയ ഒരു കേരള മാതൃകയാണ് തൊഴില് സഭ മുന്നോട്ടുവയ്ക്കുന്നത്.
തൊഴില് ലഭ്യമാക്കുക എന്ന ഉത്തരവാദിത്തത്തില്നിന്ന് സര്ക്കാരുകള് പിന്മാറണമെന്ന കാഴ്ചപ്പാട് രാജ്യത്ത് ശക്തമാകുന്ന സാഹചര്യമാണ്. എന്നാല്, കേരളത്തിന്റേതു ബദല് ഇടപെടലാണ്. തൊഴില് അന്വേഷകരെയും സംരംഭകരെയും ഒന്നിപ്പിക്കുന്നു എന്നതാണ് ഇതിന്റെ സവിശേഷത.
ഡിജിറ്റല് വ്യവസായ രംഗത്തുണ്ടായ മാറ്റങ്ങള് പ്രയോജനപ്പെടുത്തി 20 ലക്ഷം അഭ്യസ്തവിദ്യര്ക്ക് ഡിജിറ്റല് മേഖലയില് തൊഴില് ലഭ്യമാക്കും. തദ്ദേശ സ്വയംഭരണ സ്ഥാപനങ്ങളുടെ നേതൃത്വത്തില് വര്ക്ക് നിയര് ഹോം വര്ക്ക് സ്റ്റേഷനുകള് ഒരുക്കുന്നതിനുള്ള പദ്ധതിക്ക് രൂപം നല്കിക്കഴിഞ്ഞു-മുഖ്യമന്ത്രി പറഞ്ഞു.