ന്യൂഡല്ഹി: ഏറനാട് മണ്ഡലത്തിലെ മുസ്ലീംലീഗ് എംഎല്എ പി.കെ ബഷീറിന്റെ കൊലവിളി പ്രസംഗ കേസ് റദ്ദാക്കിയ മുന് യു.ഡി.എഫ് സര്ക്കാരിന്റെ നടപടി സുപ്രിംകോടതി റദ്ദാക്കി. സുപ്രീം കോടതിയില് കേസിന്റെ നടപടികള് തുടരണമെന്ന് ചീഫ് ജസറ്റിസ് ദീപക് മിശ്ര അദ്ധ്യക്ഷനായ ഡിവിഷന് ബെഞ്ച്്് നിര്ദേശിച്ചു.
ഏഴാം ക്ലാസിലെ സാമൂഹ്യശാസ്ത്ര പാഠപുസ്തകത്തില് മതമില്ലാത്ത ജീവന് എന്ന അദ്ധ്യായം ചേര്ത്തതിനെതിരെയുള്ള സമരത്തിനിടയില് കിരിശേരി ഗവ. സ്കൂളില് നടന്ന ക്ലസ്റ്റര് മീറ്റിംഗില് പങ്കെടുക്കാന് പോയ ജെയിംസ് അഗസ്റ്റിന് എന്ന അദ്ധ്യാപകന് മരിക്കുകയായിരുന്നു.
മീറ്റിംഗ് നടന്നുകൊണ്ടിരിക്കെ ഒരുകൂട്ടം യൂത്ത് ലീഗ് പ്രവര്ത്തകര് ക്ലാസ് റൂമിലേക്ക് ഇരച്ചുകയറുകയും തുടര്ന്നുണ്ടായ സംഘര്ഷത്തില് അധ്യാപകന് കൊല്ലപ്പെടുകയുമായിരുന്നു. ഈ കേസില് ഏതാനും യൂത്ത് ലീഗ് പ്രവര്ത്തകര് അറസ്റ്റിലാകുകയും ചെയ്തിരുന്നു. പിന്നീട് നടന്ന ഒരു പൊതുയോഗത്തിലാണ് ബഷീര് ഭീഷണി മുഴക്കിയത്.
ഏറനാട് നിയോജകമണ്ഡലം മുസ്ലിം ലീഗ് കമ്മിറ്റിയൊരു തീരുമാനമെടുത്തിട്ടുണ്ട്. ഇതിന്റെ പ്രസിഡന്റ് എന്ന നിലയ്ക്ക് ഞാന് പറയുന്നത് ഈ കേസ് കോടതിയില് എന്നെങ്കിലും വരുകയാണെങ്കില് സാക്ഷി പറയാന് ആരെങ്കിലും എത്തിയാല് അവന് ജീവനോടെ തിരിച്ചുപോകില്ല എന്നായിരുന്നു ബഷീറിന്റെ പ്രസംഗം.