ന്യൂഡല്ഹി: റഫാല് യുദ്ധവിമാനങ്ങളുടെ സാങ്കേതിക വശങ്ങള് വിശദീകരിക്കുന്നതിന് വ്യോമസേനയുടെ ഉന്നത ഉദ്യോഗസ്ഥന് ഹാജരാകണമെന്ന് സുപ്രീംകോടതി. വിമാനങ്ങളുടെ സാങ്കേതിക വശങ്ങള് വിശദീകരിക്കാന് പ്രതിരോധ മന്ത്രാലയത്തിലെ ഉദ്യോഗസ്ഥരെ വിളിക്കാമെന്ന അറ്റോര്ണി ജനറലിന്റെ വാദവും സുപ്രീംകോടതി തള്ളി. ഉടന് വ്യോമസേന ഉദ്യോഗസ്ഥന് കോടതിയില് ഹാജരാകണമെന്നും കോടതി നിര്ദേശിച്ചു.
ചീഫ് ജസ്റ്റീസ് രഞ്ജന് ഗൊഗോയ് അധ്യക്ഷനായ ബെഞ്ചിന്റേതാണ് നടപടി. റഫാല് വിലയില് ഇപ്പോള് ചര്ച്ച വേണ്ടെന്നും ചീഫ് ജസ്റ്റീസ് രഞ്ജന് ഗൊഗോയ് വ്യക്തമാക്കി. വില വിവരങ്ങള് പരസ്യപ്പെടുത്തണമെന്ന് കോടതി തീരുമാനിച്ചാല് മാത്രം ഇക്കാര്യം ചര്ച്ച ചെയ്താല് മതിയെന്നും ചീഫ് ജസ്റ്റീസ് കൂട്ടിച്ചേര്ത്തു.
അതേസമയം റഫാല് ഇടപാടു കോടതി വിലയിരുത്തുന്നതിനെ കേന്ദ്രം എതിര്ത്തു. ഇടപാടു വിലയിരുത്തേണ്ടതു വിദഗ്ധരാണെന്നും കോടതി അല്ലെന്നും അറ്റോര്ണി ജനറല് പറഞ്ഞു. എന്നാല് കരാറിലെ രഹസ്യ നിയമത്തെക്കുറിച്ചുള്ള വിവരങ്ങള് പുറത്തുവിടണമെന്ന് പ്രശാന്ത് ഭൂഷന് ആവശ്യപ്പെട്ടു.
രഹസ്യ ധാരണ രഹസ്യമായിരിക്കണമെന്നും അതു കോടതിയില് ഹാജരാക്കുന്നത് എങ്ങനെയെന്നും അറ്റോര്ണി ജനറല് ചോദിച്ചു. റഫാല് ഇടപാടില് ജുഡീഷല് പരിശോധന ആവശ്യമില്ലെന്നും അറ്റോര്ണി ജനറല് വാദിച്ചു