കൊച്ചി: ഭീകരവാദ സംഘടനായ ഐസിസിലേക്ക് മലയാളികളെ റിക്രൂട്ട് ചെയ്ത കേസില് ദേശീയ അന്വേഷണ ഏജന്സി കസ്റ്റഡിയില് വാങ്ങിയ പ്രതി പാലക്കാട് സ്വദേശി റിയാസ് അബൂബക്കറെ (29) റോ, മിലിട്ടറി ഇന്റലിജന്സ് മേധാവികള് ചോദ്യം ചെയ്യും. കേരളത്തില് ഐസിസിനായി ചാവേറാകാന് താന് ആഗ്രഹിച്ചിരുന്നതായി എന്.ഐ.എയോട് വെളിപ്പെടുത്തിയിരുന്നു. ഈ സാഹചര്യത്തിലാണ് മറ്റ് അന്വേഷണ ഏജന്സി തലവന്മാര് കൂടി ഇയാളെ ചോദ്യം ചെയ്യാന് ഒരുങ്ങുന്നത്. ശ്രീലങ്കന് സ്ഫോടനത്തിലെ കേരള ബന്ധം കണ്ടെത്താനായി മിലിട്ടറി ഇന്റലിജന്സ്, റോ, എന്.ഐ.എ, ഇന്റലിജന്സ് ബ്യൂറോ എന്നിവയുടെ സംയുക്ത സംഘം കഴിഞ്ഞ ദിവസം മുതല് കൊച്ചിയില് തമ്ബടിക്കുകയാണ്. എന്.ഐ.എ ഐ.ജി. അലോക് മിത്തലാണ് അന്വേഷണം ഏകോപിപ്പിക്കുന്നത്. നാല് ദിവസത്തേക്കാണ് റിയാസിനെ കസ്റ്റഡിയില് വിട്ടിട്ടുള്ളത്. നിലവില്, റിയാസിനെ എന്.ഐ.എ ഉദ്യോഗസ്ഥരുടെ നേതൃത്വത്തില് ചോദ്യം ചെയ്തു വരികയാണ്.
ഐസിസില് ചേരാന് നാടുവിട്ടവരെക്കുറിച്ച് അറിയാനും വേറെ ഐസിസ് അനുകൂല ഗ്രൂപ്പുകള് (മൊഡ്യൂളുകള്) കേരളത്തില് പ്രവര്ത്തിക്കുന്നുണ്ടോയെന്ന് കണ്ടെത്താനുമാണ് എന്.ഐ.എയുടെ ശ്രമം. ചോദ്യം ചെയ്യലില് ഇക്കാര്യങ്ങള് പുറത്ത് കൊണ്ടുവരാനാകുമെന്നാണ് ഉദ്യോഗസ്ഥരുടെ പ്രതീക്ഷ.റിയാസില് നിന്നും ലഭിക്കുന്ന വിവരങ്ങള് മറ്റ് അന്വേഷണ ഏന്ജന്സികള്ക്കും കൈമാറിയേക്കും. ശ്രീലങ്കയില് ചാവേറാക്രമണം നടത്തിയ സഹ്റാന് ഹാഷിമിന്റെ പ്രഭാഷണങ്ങളും വീഡിയോകളും ഒരു വര്ഷമായി പിന്തുടരുന്നുണ്ടെന്ന് വെളിപ്പെടുത്തിയ റിയാസ് സക്കീര് നായിക്കിന്റെ പ്രഭാഷണങ്ങളും തന്നെ സ്വാധീനിച്ചിട്ടുണ്ടെന്ന് അന്വേഷണ സംഘത്തോട് സമ്മതിച്ചിട്ടുണ്ട്. ഐസിസ് റിക്രൂട്ട്മെന്റ് കേസില് ഒളിവില് കഴിയുന്ന ഒന്നാം പ്രതി അബ്ദുള് റാഷിദുമായും ഒളിവില് കഴിയുന്ന മറ്റൊരു പ്രതിയുമായും 2016 മുതല് ഒാണ്ലൈന് ചാറ്റിംഗ് ഉണ്ടെന്നും ഇന്ത്യയില് ഭീകരാക്രമണങ്ങള് നടത്താന് ആഹ്വാനം ചെയ്യുന്നതുള്പ്പെടെ റാഷിദിന്റെ ആഡിയോ ക്ളിപ്പുകള് സോഷ്യല് മീഡിയയില് പ്രചരിപ്പിച്ചിട്ടുണ്ടെന്നും എന്.ഐ.എ കണ്ടെത്തിയിട്ടുണ്ട്. ഏപ്രില് 29നാണ് ഇയാളെ എന്.ഐ.എ അറസ്റ്റ് ചെയ്തത്.
അതേസമയം, റിയാസ് അബൂബക്കറിന് പുറമെ ഐസിസ് കേസില് ഇന്നലെ എന്.ഐ.എ പ്രതി ചേര്ത്ത മൂന്ന് പേര് ഒളിവിലുള്ള അബ്ദുള് റാഷിദിന്റെയടക്കം നിര്ദ്ദേശപ്രകാരം ഒറ്റ ഗ്രൂപ്പായി തീവ്രവാദങ്ങള്ക്ക് ആസൂത്രണങ്ങള് നടത്തി വരികയായിരുന്നു. ഖത്തറില് കഴിയുന്ന കൊല്ലം കരുനാഗപ്പള്ളി ചങ്ങന്കുളങ്ങര അനസ് ഫ്ളോര് മില്ലിനു സമീപം വക്കേത്തറയില് അബു മര്വാന് അല് ഹിന്ദി എന്നറിയപ്പെടുന്ന മുഹമ്മദ് ഫൈസല് (29), കാസര്കോട് കളിയങ്ങാട് പള്ളിക്കല് മന്സിലില് അബു ഈസ എന്ന പി.എ. അബൂബക്കര് സിദ്ദിഖ് (28), കാസര്കോട് എരുത്തുംകടവ് വിദ്യാനഗര് സിനാന് മന്സിലില് അഹമ്മദ് അറാഫത്ത് എന്നിവരെയാണ് ഇന്നലെ പ്രതി ചേര്ത്തത്. കാസര്കോട്ട് നിന്ന് യുവാക്കളെ ഐസിസിലേക്ക് റിക്രൂട്ട് ചെയ്ത കേസിലാണിത്.