തിരുവനന്തപുരം : ഓണത്തോടനുബന്ധിച്ച് സംസ്ഥാനത്തെ അന്ത്യോദയ അന്നയോജന വിഭാഗത്തില്പ്പെട്ട 5.95 ലക്ഷം കുടുംബങ്ങള്ക്ക് സൗജന്യ ഓണ കിറ്റുകള് നല്കാന് ബുധനാഴ്ച ചേര്ന്ന മന്ത്രിസഭായോഗം തീരുമാനിച്ചു. സപ്ലൈകോ വഴിയാണ് കിറ്റ് വിതരണം ചെയ്യുക.
6.91 കോടി രൂപയാണ് ഇതിനായി ചെലവ് വരിക. സംസ്ഥാനത്തെ 81 ലക്ഷം കാര്ഡ് ഉടമകള്ക്ക് ഒരു കിലോ പഞ്ചസാര 22 രൂപ നിരക്കില് റേഷന് കടകള് വഴി വിതരണം ചെയ്യാനും യോഗം തീരുമാനിച്ചു.
മത്സ്യലേലവും വിപണനവും നിയന്ത്രിക്കുന്നതിനും ഗുണനിലവാരം ഉറപ്പുവരുത്തുന്നതിനും നിയമനിര്മ്മാണം നടത്താനും മന്ത്രിസഭ തീരുമാനിച്ചു. ഇത് സംബന്ധിച്ച കരട് ബില്ലിന് മന്ത്രിസഭ അംഗീകാരം നല്കി.
ഫിഷ് ലാന്ഡിംഗ് സെന്റര്, ഫിഷിങ് ഹാര്ബര്, ഫിഷ് മാര്ക്കറ്റ് എന്നിവിടങ്ങളില് മത്സ്യലേലം നടത്തുന്നതിന് ഇപ്പോള് നിയന്ത്രണങ്ങള് ഒന്നുമില്ല. അതിനാല് മത്സ്യത്തൊഴിലാളികളില് നിന്ന് ഭീമമായ കമ്മിഷന് ഇടനിലക്കാരായ ലേലക്കാര് ഈടാക്കുന്നുണ്ട്. അത് പരിഹരിക്കാനാണ് മത്സ്യലേലവും അതുമായി ബന്ധപ്പെട്ട പ്രവര്ത്തനങ്ങളും നിയന്ത്രിക്കുന്നത്.
കാലവര്ഷത്തില് തകര്ന്ന റോഡുകള് അടിയന്തിരമായി നന്നാക്കുന്നതിന് മന്ത്രിസഭായോഗം തീരുമാനിച്ചു.