തിരുവനന്തപുരം: ലോക്സഭാ സീറ്റ് വിഷയത്തിലുടക്കി പിളര്പ്പിന്റെ വക്കിലെത്തിയ കേരള കോണ്ഗ്രസിലെ പ്രശ്നങ്ങള് പരിഹരിക്കാനുള്ള ശ്രമങ്ങള് തുടരുമെന്ന് പ്രതിപക്ഷ നേതാവ് രമേശ് ചെന്നിത്തല. മറ്റ് ഘടകക്ഷികളുമായും ഈ വിഷയം ചര്ച്ച ചെയ്യുമെന്നും അദ്ദേഹം വ്യക്തമാക്കി.
പ്രശ്നങ്ങള് പരിഹരിച്ച് മുന്നോട്ട് പോകണമെന്ന് നിര്ദേശിക്കുമെന്നും തെരഞ്ഞെടുപ്പ് വിജയം മാത്രമാണ് യുഡിഎഫ് ലക്ഷ്യമെന്നും ചെന്നിത്തല കൂട്ടിച്ചേര്ത്തു. അല്പംകൂടി കാത്തിരിക്കാനായിരുന്നു ചെന്നിത്തലക്കൊപ്പമുണ്ടായിരുന്ന എഐസിസി ജനറല് സെക്രട്ടറി ഉമ്മന് ചാണ്ടിയുടെ പ്രതികരണം. പ്രതിപക്ഷ നേതാവിന്റെ ഔദ്യോഗിക വസതിയായ കന്റോണ്മെന്റ് ഹൗസില് ജോസഫ് വിഭാഗം നേതാക്കളുമായി കൂടിക്കാഴ്ച നടത്തിയ ശേഷം മാധ്യമങ്ങളോട് പ്രതികരിക്കുകയായിരുന്നു കോണ്ഗ്രസ് നേതാക്കള്.
പി.ജെ.ജോസഫ്, മോന്സ് ജോസഫ്, ടി.യു.കുരുവിള എന്നീ നേതാക്കളാണ് കെപിസിസി അധ്യക്ഷന് മുല്ലപ്പള്ളി രാമചന്ദ്രന്, രമേശ് ചെന്നിത്തല, ഉമ്മന്ചാണ്ടി എന്നിവരുമായി കൂടിക്കാഴ്ച നടത്തിയത്.
ഇതിനു മുന്നോടിയായി ബുധനാഴ്ച രാവിലെ ജോസഫ്, ഉമ്മന് ചാണ്ടിയേയും രമേശ് ചെന്നിത്തലയേയും നേരില് കാണുകയും ചെയ്തിരുന്നു.
