ന്യൂഡല്ഹി: കോണ്ഗ്രസ് തന്റെ അമ്മയെ അധിക്ഷേപിച്ചെന്നും അച്ഛനാരാണെന്നു ചോദിച്ചെന്നും പരാതിപ്പെട്ട് പ്രധാനമന്ത്രി നരേന്ദ്ര മോദി. മുന് പ്രധാനമന്ത്രി രാജീവ് ഗാന്ധിയെ ഒന്നാം നന്പര് അഴിമതിക്കാരന് എന്നു വിളിച്ചതില് മോദിക്കെതിരേ പ്രതിപക്ഷം ഒറ്റക്കെട്ടായി രംഗത്തെത്തിയ സാഹചര്യത്തിലാണ് പ്രധാനമന്ത്രിയുടെ പരാമര്ശം. തനിക്കെതിരേ കോണ്ഗ്രസ് നേതാക്കള് പ്രയോഗിച്ചത് എന്നു ചൂണ്ടിക്കാട്ടി 20 പദപ്രയോഗങ്ങളുടെ പട്ടികയും തെരഞ്ഞെടുപ്പ് റാലിയില് മോദി നിരത്തി.
നാടുവാഴി (നാംദാര്) ലൗ ഡിക്ഷണറി മുറുകെപിടിക്കുന്ന രീതിയെ ആരും ചോദ്യം ചെയ്യുന്നില്ല. എന്നെ അസഭ്യം പറഞ്ഞ് അവര് അവരുടെ മാന്യത പിച്ചിച്ചീന്തി. കോണ്ഗ്രസ് അധ്യക്ഷനെ ഇപ്പോള് ആരും മുഖവിലയ്ക്കെടുക്കുന്നില്ല- മോദി പറഞ്ഞു. സോണിയ ഗാന്ധിയുടെ കുപ്രസിദ്ധമായ മരണത്തിന്റെ വ്യാപാരി പരാമര്ശം ഉള്പ്പെടെ കോണ്ഗ്രസ് നേതാക്കള് തനിക്കെതിരേ നടത്തിയ പ്രയോഗങ്ങളുടെ പട്ടിയും മോദി നിരത്തി.
തന്നെ വെട്ടിമുറിക്കുമെന്ന് പറയുന്ന ആളുകളെയാണ് കോണ്ഗ്രസ് പിന്തുണയ്ക്കുന്നതെന്നും അവര്ക്ക് കോണ്ഗ്രസ് പാര്ട്ടി ടിക്കറ്റ് നല്കിയെന്നും മോദി കുറ്റപ്പെടുത്തി. ഇതില് ആരും അവരെ ചോദ്യം ചെയ്യുന്നില്ല എന്നതാണ് ഈ വലിയ രാജ്യത്തെ ജനാധിപത്യത്തിന്റെ രസമെന്നും മോദി പറഞ്ഞു.
നേരത്തെ, പ്രധാനമന്ത്രി നരേന്ദ്ര മോദിയോട് തനിക്ക് സ്നേഹം മാത്രമേ ഉള്ളുവെന്ന് രാഹുല് പാര്ലമെന്റില് പറഞ്ഞിരുന്നു. പിന്നീട് നിരവധി തവണ അദ്ദേഹം ഇത് ആവര്ത്തിച്ചു. രാജീവ് ഗാന്ധിയെ സംബന്ധിച്ച പരാമര്ശത്തിനു നല്കിയ മറുപടിയും രാഹുല് ഇത് പ്രയോഗിച്ചു.