ന്യൂഡല്‍ഹി: ലോക്​ഡൗണിനിടെ പടിഞ്ഞാറന്‍ ഡല്‍ഹിയില്‍ 35കാരി ഭര്‍തൃമാതാവിനെയും പിതാവിനെയും കൊലപ്പെടുത്തി. 35 കാരിയായ കവിതയാണ്​ ഭര്‍തൃപിതാവ്​ രാജ്​ സിങിനെയും(61) ഭാര്യ ഓംവതിയെയും ( 58) കൊലപ്പെടുത്തിയത്.വസ്തു തര്‍ക്കമാണ് കൊലപാതകത്തില്‍ കലാശിച്ചതെന്നാണ് പൊലീസിന്റെ പ്രാഥമിക നി​ഗമനം.

പടിഞ്ഞാറന്‍ ഡല്‍ഹി ചവ്വാല മേഖലയിലെ ദുര്‍ഗ വിഹാറിലാണ്​ ക്രൂരകൃത്യം നടന്നത്​. സംഭവം നടക്കുമ്ബോള്‍ യുവതിയുടെ ഭര്‍ത്താവും രണ്ട്​ മക്കളും വീട്ടിലുണ്ടായിരുന്നുവെന്ന്​ പൊലീസ്​ പറഞ്ഞു. രാവിലെ 11നാണ്​ ഇരട്ടക്കൊലപാതകങ്ങളെ കുറിച്ച്‌​ പൊലീസിന്​ വിവരം ലഭിക്കുന്നത്​. കിടപ്പുമുറിയിലാണ്​ മൃതദേഹങ്ങള്‍ കാണപ്പെട്ടത്​. ഇരുവരുടെയും മുഖത്ത്​ ആഴത്തില്‍ മുറിവേറ്റ പാടുണ്ടായിരുന്നുവെന്ന്​ പൊലീസ്​ പറഞ്ഞു.

കൊലപാതകത്തില്‍ കവിതയുടെ ഭര്‍ത്താവ്​ സതിഷ്​ സിങ്ങി​ന്റെ പങ്കിനെ കുറിച്ച്‌​ പൊലീസ്​ അന്വേഷിച്ചുവരികയാണ്​. കവിതയെ ചോദ്യം ചെയ്​തെങ്കിലും അറസ്​റ്റ്​ രേഖപ്പെടുത്തിയിട്ടില്ല. ഭര്‍തൃമാതാവിനെയും പിതാവിനെയും കഴുത്തുഞെരിച്ച്‌ ശ്വാസമുട്ടിച്ച ശേഷം കുത്തി കൊലപ്പെടുത്തുകയായിരുന്നുവെന്നാണ് പൊലീസ് പറയുന്നത്.