തിരുവനന്തപുരം: ബാര്കോഴയില് പ്രതിപക്ഷ നേതാവ് രമേശ് ചെന്നിത്തലയ്ക്കെതിരെ വിജിലന്സ് അന്വേഷണത്തിനു അനുമതി. ചെന്നിത്തല കോഴ വാങ്ങിയെന്ന ബിജു രമേശിന്റെ വെളിപ്പെടുത്തലിന്റെ അടിസ്ഥാനത്തിലാണ് അന്വേഷണം.
വിജിലന്സ് അന്വേഷണത്തിനു മുഖ്യമന്ത്രി പിണറായി വിജയന് അനുമതി നല്കി. ഉമ്മന്ചാണ്ടി സര്ക്കാരില് മന്ത്രിമാരായിരുന്ന കെ.ബാബു, വി.എസ്.ശിവകുമാര് എന്നിവര്ക്കെതിരെയും അന്വേഷണത്തിനു അനുമതി. കേസെടുത്ത് അന്വേഷണം നടത്തണമെന്ന വിജിലന്സ് ആവശ്യം മുഖ്യമന്ത്രി അംഗീകരിക്കുകയായിരുന്നു.
അതേസമയം, അന്വേഷണത്തില് അന്തിമതീരുമാനമെടുക്കേണ്ടത് ഗവര്ണറാണ്. ഫയല് കൈമാറിയെങ്കിലും ഗവര്ണര് ഇതുവരെ തീരുമാനമറിയിച്ചിട്ടില്ല.
ബാര് കോഴക്കേസില് രമേശ് ചെന്നിത്തല അടക്കമുള്ളവര്ക്കെതിരെ സിബിഐ അന്വേഷണം ആവശ്യപ്പെട്ടുള്ള ഹര്ജിയില് ഹൈക്കോടതി സര്ക്കാരിന്റെയും സിബിഐയുടെയും വിശദീകരണം തേടിയിട്ടുണ്ട്. രമേശ് ചെന്നിത്തല, കെ.ബാബു, വി.എസ്.ശിവകുമാര് എന്നിവര്ക്ക് കോഴ നല്കിയെന്ന ബിജു രമേശിന്റെ വെളിപ്പെടുത്തലിന്റെ അടിസ്ഥാനത്തില് ചാലക്കുടി സ്വദേശി പി.എല്.ജേക്കബ് സമര്പ്പിച്ച ഹര്ജിയിലാണ് ജസ്റ്റിസ് പി.വി.കുഞ്ഞികൃഷ്ണന് സര്ക്കാരിന്റെ വിശദീകരണം തേടിയത്. രമേശ് ചെന്നിത്തലക്ക് ഒരു കോടി നല്കിയെന്നാണ് ആരോപണം.