ഭോപ്പാല്: മധ്യപ്രദേശില് അധികാരത്തിലെത്തിയാല് സര്ക്കാര് ജീവനക്കാരെ ആര്എസ്എസ് ശാഖലയില് പോകാന് അനുവദിക്കില്ലെന്ന് കോണ്ഗ്രസ്. നിയമസഭാ തെരഞ്ഞെടുപ്പിനു മുന്നോടിയായി പുറത്തിറക്കിയ പ്രകടനപത്രികയിലാണ് ഇതു സംബന്ധിച്ച വാഗ്ദാനമുള്ളത്.
സര്ക്കാര് കെട്ടിടങ്ങളുടെ പരിധിയില് ശാഖകള് പ്രവര്ത്തിക്കാന് അനുവദിക്കില്ലെന്നും ഓഫീസര്മാര്ക്കും ജീവനക്കാര്ക്കും ശാഖയില് പങ്കെടുക്കാന് ശിവരാജ്സിംഗ് ചൗഹാന് സര്ക്കാര് നല്കിയ അനുമതി റദ്ദു ചെയ്യുമെന്നും പ്രകടനപത്രികയില് പറയുന്നു. 12 വര്ഷം മുന്പാണ് ശാഖകളില് പങ്കെടുക്കാന് സര്ക്കാര് ജീവനക്കാര്ക്ക് മുഖ്യമന്ത്രി ശിവരാജ് സിംഗ് ചൗഹാന് അനുമതി നല്കുന്നത്.
പ്രകടനപത്രികയിലെ പരാമര്ശം ബിജെപി ഏറ്റുപിടിച്ചതോടെ പ്രതികരണവുമായി കോണ്ഗ്രസ് നേതാവ് പി.ചിദംബരം രംഗത്തെത്തി. ആര്എസ്എസ് രാഷ്ട്രീയ സംഘടനയാണെന്നും സര്ക്കാര് ജീവനക്കാര് ശാഖയില് പോകുന്നത് അവസാനിപ്പിക്കുമെന്നു പറഞ്ഞാല് അതില് തെറ്റുപറയാനില്ലെന്നും ചിദംബരം വ്യക്തമാക്കി. ജീവനക്കാര്ക്ക് സര്ക്കാരിനോടാകണം കൂറെന്നും അദ്ദേഹം കൂട്ടിച്ചേര്ത്തു.