ന്യൂഡല്ഹി: കര്ഷകരുടെ ഇരുണ്ടഭാവിയും യുവാക്കളുടെ തൊഴിലില്ലായ്മയുമാണ് രാജ്യം നേരിടുന്ന രണ്ട് പ്രധാന വെല്ലുവിളിയെന്ന് കോണ്ഗ്രസ് അധ്യക്ഷന് രാഹുല് ഗാന്ധി. കാര്ഷിക പ്രശ്നങ്ങള് ചര്ച്ച ചെയ്യാന് പ്രത്യേക പാര്ലമെന്റ് സമ്മേളനം വിളിക്കണമെന്നാവശ്യപ്പെട്ടു നടക്കുന്ന കിസാന് മുക്തി റാലിയില് സംസാരിക്കുകയായിരുന്നു രാഹുല്.
രാജ്യത്തെ അതിസമ്ബന്നരായ 15 വ്യവസായികളുടെ കടം എഴുതിത്തള്ളാമെങ്കില് കര്ഷകരുടെ കടം എഴുതിത്തള്ളാനും പ്രധാനമന്ത്രി നരേന്ദ്ര മോദി ബാധ്യസ്ഥനാണെന്ന് കോണ്ഗ്രസ് അധ്യക്ഷന് പറഞ്ഞു. തങ്ങള്ക്ക് നല്കുമെന്ന് പറഞ്ഞതാണ് കര്ഷകര് കാത്തിരിക്കുന്നത്. എന്നാല് ഈ പണമെല്ലാം അനില് അംബാനിയുടെ പോക്കറ്റിലേക്ക് പോയിരിക്കുകയാണ്. ശൂന്യമായ പ്രസംഗങ്ങളല്ലാതെ കര്ഷകര്ക്ക് ഒന്നും കിട്ടിയിട്ടില്ലെന്നും രാഹുല് പറഞ്ഞു.
ഡല്ഹിയുടെ നാല് അതിര്ത്തിയില് നിന്നും വ്യാഴാഴ്ച രാവിലെ കര്ഷകരുടെ വോളന്റിയര് മാര്ച്ചുകള് ആരംഭിച്ചിരുന്നു. ഗുഡ്ഗാവ്, നിസാമുദീന്, ആനന്ദ് വിഹാര്, മജ്നു കാ ടില എന്നിവിടങ്ങളില് നിന്നാണ് മാര്ച്ചുകള് ഡല്ഹിയിലേക്കെത്തിയത്. ആയിരക്കണക്കിനാളുകളാണ് റാലിയില് അണിനിരക്കുന്നത്. കാര് ഷികവിളകള്ക്ക് ആദായകരമായ വില ലഭ്യമാക്കാനും കാര്ഷികകടങ്ങള് പൂര്ണമായി എഴുതിത്തള്ളാനും നിയമനിര്മാണം നടത്തണമെന്ന് ആവശ്യപ്പെട്ട് അഖി ലേന്ത്യാ കിസാന് സംഘര്ഷ് കോ ഓര്ഡിനേഷന് കമ്മിറ്റി നടത്തിവരുന്ന പ്രക്ഷോഭത്തിന്റെ ഭാഗമായാണു റാലി സംഘടിപ്പിച്ചത്.