ന്യൂഡല്ഹി: കുടിയേറ്റ തൊഴിലാളികളുടെ പലായനവുമായി ബന്ധപ്പെട്ട് സുപ്രീംകോടതി കേന്ദ്രസര്ക്കാറില് നിന്ന് തല്സ്ഥിതി റിപ്പോര്ട്ട് തേടി. ഇത് നാളെ തന്നെ കോടതിയില് സമര്പ്പിക്കണമെന്നും നിര്ദേശിച്ചു. എന്നാല്, വിഷയത്തില് കേന്ദ്രസര്ക്കാറിന് നിര്ദേശങ്ങളോ ഉത്തരവുകളോ നല്കാന് കോടതി വിസമ്മതിച്ചു. പ്രശ്നത്തില് സര്ക്കാര് ഇടപെട്ടിട്ടുണ്ട്. കേന്ദ്രസര്ക്കാറിന് നിര്ദേശങ്ങള് നല്കി കുടിയേറ്റ തൊഴിലാളികളുടെ പലായനം സംബന്ധിച്ച പ്രശ്നം കൂടുതല് വഷളാക്കാനില്ലെന്ന് സുപ്രീംകോടതി പറഞ്ഞു.
ചീഫ് ജസ്റ്റിസ് എസ്.എ ബോബ്ഡേ ജസ്റ്റിസ് എല്.നാഗേശ്വര റാവു എന്നിവരടങ്ങിയ ബെഞ്ചാണ് ഹരജി പരിഗണിച്ചത്. അഭിഭാഷകരായ അലോക് ശ്രീവാസ്തവ, രശ്മി ബന്സാല് എന്നിവരാണ് ഇതുമായി ബന്ധപ്പെട്ട ഹരജി നല്കിയത്. ഡല്ഹിയുള്പ്പടെയുള്ള സംസ്ഥാനങ്ങളിലെ കുടിയേറ്റ തൊഴിലാളികള്ക്ക് ഭക്ഷണവും വെള്ളവും താമസവും ഉറപ്പാക്കണമെന്നായിരുന്നു അലോക് ശ്രീവാസ്തവയുടെ പ്രധാന ആവശ്യം.
ഹരജി പരിഗണിക്കുന്നതിനിടെ കേന്ദ്രസര്ക്കാറും സംസ്ഥാന സര്ക്കാറുകളും കുടിയേറ്റ തൊഴിലാളികളുടെ പ്രശ്നം പരിഹരിക്കുന്നതിനും ഇവരിലൂടെ വൈറസ് ബാധ പടരാതിരിക്കുന്നതിനുമുള്ള നടപടികള് സ്വീകരിക്കുന്നുണ്ടെന്ന് സോളിസിറ്റര് ജനറല് തുഷാര് മേത്ത അറിയിച്ചു. കേസ് കോടതി നാളെ വീണ്ടും പരിഗണിക്കും.