ഈറോഡ്: പ്രായപൂര്‍ത്തിയാകാത്ത പെണ്‍കുട്ടിയുടെ അണ്ഡം വില്‍പന നടത്തിയ സംഭവത്തില്‍ മൂന്ന് പേരെ അറസ്റ്റ് ചെയ്ത് തമിഴ്‌നാട് പോലീസ്. ഈറോഡിലെ ഒരു ഫെര്‍ട്ടിലിറ്റി ക്ലിനിക്ക് കേന്ദ്രീകരിച്ചാണ് അനധികൃത ഇടപാട് നടന്നതെന്നാണ് പോലീസ് പറയുന്നത്. 13വയസുള്ള പെണ്‍കുട്ടിയെ നിര്‍ബന്ധിച്ച് എട്ട് തവണയോളം അണ്ഡം ദാനം ചെയ്യിച്ചെന്നാണ് റിപ്പോര്‍ട്ടുകള്‍.
കുട്ടിയുടെ അമ്മയും കാമുകനും മറ്റൊരു സ്ത്രീയുമാണ് അറസ്റ്റിലായിട്ടുള്ളത്. കുട്ടിയുടെ അമ്മയും ആശുപത്രിയുമായുള്ള ഇടപാടുകാരിയുമായ ഇന്ദ്രാണി എന്ന സുമയ്യ (36) ആണ് കേസിലെ മുഖ്യപ്രതി. കുട്ടിയെ ബലം പ്രയോഗിച്ച് ആശുപത്രിയിലെത്തിച്ച് അണ്ഡം ദാനം ചെയ്യിക്കുകയായിരുന്നു എന്നാണ് വിവരം. ഒരു തവണ അണ്ഡം ദാനം ചെയ്യുമ്പോള്‍ 25,000 രൂപ വരെയാണ് പ്രതിഫലം ലഭിച്ചിരുന്നത്. ഇന്ദ്രാണിയുടെ കാമുകനായ സെയ്ദ് അലിയാണ് അറസ്റ്റിലായ മറ്റൊരാള്‍. ഇടനിലക്കാരിയായ മാലതി (30) എന്ന സ്ത്രീയും അറസ്റ്റിലായിട്ടുണ്ട്.
അമ്മയുടെ പീഡനം സഹിക്കവയ്യാതെ വന്നതോടെ കുട്ടി സേലത്തെ ഒരു ബന്ധുവിന്റെ വീട്ടിലേയ്ക്ക് കടക്കുകയായിരുന്നു. നിലവില്‍ 16 വയസുള്ള പെണ്‍കുട്ടി ഇവരോട് ദുരനുഭവം തുറന്നു പറഞ്ഞതോടെയാണ് സംഭവം പുറംലോകമറിയുന്നത്. തുടര്‍ന്ന് ബന്ധു ഇന്ദ്രാണി അടക്കം മൂന്ന് പ്രതികള്‍ക്കെതിരെ പരാതി നല്‍കുകയായിരുന്നു. നാലു വര്‍ഷത്തിനിടെ എട്ട് തവണയോളം അണ്ഡം ദാനം ചെയ്യേണ്ടി വന്നതായി കുട്ടി മൊഴി നല്‍കി. പരാതിയുടെ അടിസ്ഥാനത്തില്‍ കേസെടുത്ത പോലീസ് പ്രതികളെ അറസ്റ്റ് ചെയ്തു.
പ്രതികളില്‍ നിന്ന് കുട്ടിയെ രക്ഷെപെടുത്തിയ പോലീസ് പരിശോധനകള്‍ക്കും ചികിത്സയ്ക്കുമായി ഗവണ്‍മെന്റ് ഹെഡ് ക്വാര്‍ട്ടേഴ്‌സ് ആശുപത്രിയില്‍ പ്രവേശിപ്പിച്ചിട്ടുണ്ട്. പ്രതികളെയും ആശുപത്രി അധികൃതരെയും ചോദ്യം ചെയ്യുന്നത് തുടരുകയാണ് പോലീസ്.
പെണ്‍കുട്ടിയ്ക്ക് പ്രായപൂര്‍ത്തിയായതായി കാണിക്കുന്ന വ്യാജ ആധാര്‍ കാര്‍ഡ് തയ്യാറാക്കിയാണ് അണ്ഡ വില്‍പന നടത്തിയതെന്നാണ് വിവരം. ഇത്തരത്തില്‍ ലഭിക്കുന്ന അണ്ഡം വന്ധ്യതാ ചികിത്സയ്ക്കായാണ് ഉപയോഗിക്കുന്നത്.
അതേസമയം, സെയ്ദ് അലി സുമയ്യയുടെ രണ്ടാം ഭര്‍ത്താവാണെന്ന റിപ്പോര്‍ട്ടും പുറത്തു വരുന്നുണ്ട്. പെണ്‍കുട്ടിയ്ക്ക് ആര്‍ത്തവം തുടങ്ങിയതു മുതല്‍ അമ്മ അണ്ഡം ദാനം ചെയ്യിക്കാന്‍ നിര്‍ബന്ധിക്കുകയാണെന്നും സെയ്ദ് അലി കുട്ടിയെ ഉപദ്രവിച്ചിരുന്നുവെന്നും പോലീസ് പറയുന്നു. ഓരോ ഇടപാടിലും 20,000 രൂപ ഇന്ദ്രാണിയ്ക്കും 5000 രൂപ കമ്മീഷനായി മാലതിയ്ക്കും ലഭിച്ചിരുന്നുവെന്ന് പോലീസ് വ്യക്തമാക്കി.
സംഭവത്തില്‍ അന്വേഷണം നടക്കുകയാണെന്നും കുറ്റക്കാര്‍ക്കെതിരെ കര്‍ശന നടപടിയെടുക്കുമെന്നും തമിഴ്‌നാട് ആരോഗ്യമന്ത്രി വാര്‍ത്താസമ്മേളനത്തില്‍ വ്യക്തമാക്കി. ആശുപത്രിയ്ക്ക് പങ്കുണ്ടെന്നു കണ്ടെത്തിയാല്‍ അവര്‍ക്കെതിരെയും നടപടിയുണ്ടാകുമെന്നും മന്ത്രി വ്യക്തമാക്കി.
വന്ധ്യതാ ചികിത്സയ്ക്കു വേണ്ടി അണ്ഡം ദാനം ചെയ്യാന്‍ ഇന്ത്യയില്‍ നിയമം അനുവദിക്കുന്നുണ്ട്. മരുന്നുകളുടെയും ഉപകരണങ്ങളുടെയും സഹായത്തോടെയാണ് അണ്ഡം ശേഖരിക്കുന്നത്. എന്നാല്‍ പ്രായപൂര്‍ത്തിയായ സ്ത്രീകള്‍ക്കു മാത്രമാണ് ഇതിന് അനുമതിയുള്ളത്.