മുസ്ലിം ലീഗിൻ്റെ സമുന്നത നേതാവും പ്രഗത്ഭ പത്രപ്രവർത്തകനുമായ ശ്രീ. സി.പി. സൈതലവിക്ക്, മർഹും കുളത്തൂർ മുഹമ്മദ് മൗലവിയുടെ ഓർമ്മയ്ക്കായി ഏർപ്പെടുത്തിയ ‘കർമ്മ ശ്രേഷ്ഠ അവാർഡ്’ പുഴക്കാട്ടിരി പഞ്ചായത്ത് ഗ്ലോബൽ കെഎംസിസി നൽകുമെന്ന് ഇന്ന് (തിങ്കളാഴ്ച) അറിയിച്ചു. 2025 ജൂൺ 20 വെള്ളിയാഴ്ച വൈകുന്നേരം 5:00 മുതൽ രാത്രി 10:00 വരെ പുഴക്കാട്ടിരി നാസ് ഓഡിറ്റോറിയത്തിൽ നടക്കുന്ന “സ്നേഹ ജാലകം 2025” മെഗാ പ്രോഗ്രാമിൽ വെച്ച് പാണക്കാട് സയ്യിദ് സാദിഖ് അലി ശിഹാബ് തങ്ങൾ പുരസ്കാരം സമർപ്പിക്കും.
അക്ഷരങ്ങളിലൂടെയും രാഷ്ട്രീയ-സാമൂഹിക പ്രവർത്തനങ്ങളിലൂടെയും കേരളത്തിൻ്റെ പൊതുമണ്ഡലത്തിൽ തൻ്റേതായ വ്യക്തിമുദ്ര പതിപ്പിച്ച അതുല്യ പ്രതിഭയാണ് സി.പി. സൈതലവി. ചന്ദ്രിക ദിനപത്രത്തെ ജനകീയമാക്കുന്നതിൽ നിർണായക പങ്കുവഹിച്ച അദ്ദേഹം, പതിറ്റാണ്ടുകളോളം ‘എഴുതാപ്പുറം’ എന്ന പംക്തിയിലൂടെ വായനക്കാരുടെ ശ്രദ്ധ പിടിച്ചുപറ്റി. മുനയും മൂർച്ചയുമുള്ള അദ്ദേഹത്തിൻ്റെ എഴുത്തുകൾ ചരിത്രത്തെയും സമകാലീന വിഷയങ്ങളെയും സമന്വയിപ്പിച്ച് സമൂഹത്തിൽ വലിയ സ്വാധീനം ചെലുത്തി.
വിദ്യാർത്ഥി കാലം മുതൽ സംഘടനാ പ്രവർത്തനങ്ങളിൽ സജീവമായിരുന്ന സി.പി. സൈതലവി, എംഎസ്എഫ് യൂണിറ്റ് സെക്രട്ടറി മുതൽ മുസ്ലിം ലീഗ് സംസ്ഥാന വൈസ് പ്രസിഡൻ്റ് വരെ വിവിധ പദവികൾ വഹിച്ചു. വള്ളുവനാടിൻ്റെ സമഗ്ര ചരിത്രം പ്രതിപാദിക്കുന്ന “വള്ളുവനാട് അതിജീവനത്തിൻ്റെ 100 വർഷങ്ങൾ” എന്ന പുസ്തകത്തിൻ്റെ രണ്ടാം പതിപ്പ് പുറത്തിറക്കുന്നതിൽ അദ്ദേഹത്തിൻ്റെ സഹായങ്ങളും നിർദ്ദേശങ്ങളും നിർണായകമായിരുന്നു. മാപ്പിള കലാ അക്കാദമിയുടെ അമരത്തും സ്കോൾ കേരള കൗൺസിൽ അംഗം, സംസ്ഥാന സാക്ഷരത മിഷൻ ഗവേണിങ് ബോഡി അംഗം എന്നീ നിലകളിലും അദ്ദേഹം മികവ് തെളിയിച്ചിട്ടുണ്ട്. പ്രവൃത്തിപഥത്തിലെ കർമ്മനിരതയ്ക്ക് ഇതിനോടകം നിരവധി പുരസ്കാരങ്ങൾ അദ്ദേഹത്തെ തേടിയെത്തിയിട്ടുണ്ട്.
ന്യൂനപക്ഷ അവകാശ പോരാട്ടങ്ങൾക്കും പൊതുപ്രവർത്തന രംഗത്തും സി.പി. സൈതലവി നൽകിയ സമഗ്ര സംഭാവനകളെ മാനിച്ച് നൽകുന്ന ഈ പുരസ്കാരം, അദ്ദേഹത്തോടുള്ള ആദരവും അംഗീകാരവുമാണെന്ന് പുഴക്കാട്ടിരി പഞ്ചായത്ത് ഗ്ലോബൽ കെഎംസിസി ഭാരവാഹികൾ അറിയിച്ചു.
പി.കെ. കുഞ്ഞാലിക്കുട്ടി, കെ.പി.എ. മജീദ്, പി.എം.എ. സലാം, ആബിദ് ഹുസൈൻ തങ്ങൾ എം.എൽ.എ., മഞ്ഞളാംകുഴി അലി എം.എൽ.എ. തുടങ്ങിയ പ്രമുഖ നേതാക്കൾ പങ്കെടുക്കും.

“വള്ളുവനാട് അതിജീവനത്തിൻ്റെ 100 വർഷങ്ങൾ” എന്ന പുസ്തകത്തിൻ്റെ രണ്ടാം പതിപ്പ് പ്രകാശനം, ഡോക്ടർ ഫർഹാ നൗഷാദ് നയിക്കുന്ന മോട്ടിവേഷൻ ക്ലാസ്, പ്രഗൽഭരായ ഗായകർ അണിനിരക്കുന്ന ഇശൽ നിലാവ്, മുസ്ലിം ലീഗ് ചരിത്ര പ്രദർശനം എന്നിവയും “സ്നേഹ ജാലകം 2025”-ൻ്റെ ഭാഗമായി നടക്കും.

പ്രമുഖ രാഷ്ട്രീയ, സാമൂഹിക, സാംസ്കാരിക നേതാക്കളും പൊതുജനങ്ങളും പങ്കെടുക്കുന്ന പരിപാടിയിലേക്ക് ഏവരെയും സ്വാഗതം ചെയ്യുന്നതായി സംഘാടകർ അറിയിച്ചു.

ഹനീഫ നെടുവഞ്ചേരി (പ്രസിഡൻ്റ്), റാഫി ആലിക്കൽ (ജനറൽ സെക്രട്ടറി), റഷീദ് മാമ്പ്രതൊടി (ട്രഷറർ), കരീം കുയിലൻതൊടി (ചെയർമാൻ), ശുഐബ് പള്ളിയാലിൽ (കൺവീനർ) അഷ്‌റഫ്‌ തൊട്ടിയിൽ(ജോയിന്റ് കൺവീനർ) എന്നിവർ പത്രസമ്മേളനത്തിൽ പങ്കെടുത്തു.