ഇടുക്കി: സ്വകാര്യ വ്യക്തിയുടെ സ്ഥലം, കെട്ടിടം, മതില് തുടങ്ങിയവയില് അയാളുടെ അനുവാദമില്ലാതെ കൊടിമരം നാട്ടുന്നതിനോ, ബാനറുകള് കെട്ടുന്നതിനോ പരസ്യമൊട്ടിക്കുന്നതിനോ, മുദ്രാവാക്യങ്ങള് എഴുതുന്നതിനോ ഉപയോഗിക്കുന്നതിനോ രാഷ്ട്രീയകക്ഷികളോ സ്ഥാനാര്ത്ഥികളോ അവരുടെ അനുയായികളെ അനുവദിക്കാന് പാടില്ലയെന്ന് തിരഞ്ഞെടുപ്പ് കമ്മീഷന് നിര്ദ്ദേശിച്ചു. മറ്റു പാര്ട്ടികള് സംഘടിപ്പിക്കുന്ന യോഗങ്ങളെയോ ജാഥകളെയോ തങ്ങളുടെ അനുയായികള് തടസ്സപ്പെടുത്തുകയോ അവയില് ഛിദ്രമുണ്ടാക്കുകയോ ചെയ്യുകയില്ലെന്ന് രാഷ്ട്രീയപാര്ട്ടികളും സ്ഥാനാര്ത്ഥികളും ഉറപ്പ് വരുത്തണം. ഒരു രാഷ്ട്രീയ പാര്ട്ടിയുടെ പ്രവര്ത്തകരോ അനുഭാവികളോ തങ്ങളുടെ പാര്ട്ടികളുടെ ലഘുലേഖകള് വിതരണം ചെയ്തോ, നേരിട്ടോ, രേഖാമൂലമായോ, ചോദ്യങ്ങള് ഉന്നയിച്ചോ മറ്റൊരു രാഷ്ട്രീയ പാര്ട്ടി സംഘടിപ്പിക്കുന്ന പൊതുയോഗങ്ങളില് കുഴപ്പങ്ങള് ഉണ്ടാക്കാന് പാടില്ല. ഒരു പാര്ട്ടിയുടെ യോഗങ്ങള് നടന്നുകൊണ്ടിരിക്കുന്ന സ്ഥലങ്ങളില്ക്കൂടി മറ്റൊരു പാര്ട്ടി ജാഥ നടത്തുവാന് പാടില്ല. ഒരു പാര്ട്ടി ഒട്ടിച്ചിട്ടുള്ള ചുമര് പരസ്യങ്ങള് മറ്റൊരു പാര്ട്ടിയുടെ പ്രവര്ത്തകര് നീക്കം ചെയ്യരുതെന്നും തിരഞ്ഞെടുപ്പ് കമ്മീഷന് നിര്ദ്ദേശിച്ചു.