ദേശീയ പണിമുടക്ക് ദിവസങ്ങളില് എല്ലാ ഡിപ്പോകളില് നിന്നുള്ള ശബരിമല സര്വീസുകളും തുടരുമെന്ന് കെഎസ്ആര്ടിസി. മറ്റ് സര്വീസുകള് ജീവനക്കാരുടെ ലഭ്യതയനുസരിച്ച് നടത്തുമെന്നും കെഎസ്ആര്ടിസി എംഡി ടോമിന് തച്ചങ്കരി വ്യക്തമാക്കി.
നരേന്ദ്ര മോദി സര്ക്കാറിന്റെ നയങ്ങള് തൊഴിലാളി വിരുദ്ധമെന്നാരോപിച്ച് രാജ്യത്തെ തൊഴിലാളി സംഘടനകള് നടത്തുന്ന 48 മണിക്കൂര് പണിമുടക്ക് ഇന്ന് അര്ദ്ധരാത്രി മുതല് ആരംഭിക്കും.
റയില്വെ, ബാങ്ക്, വൈദ്യുതി ബോര്ഡ് ജീവനക്കാര്, ഓട്ടോ – ടാക്സി തൊഴിലാളികള് തുടങ്ങിയവര് പണിമുടക്കില് പങ്കെടുക്കും. ബിഎംഎസ് ഒഴികെയുള്ള തൊഴിലാളി സംഘടനകളാണ് പണിമുടക്കിന് അഹ്വാനം ചെയ്തത്. സംസ്ഥാനത്ത് ശബരിമല ഒഴികെയുള്ള കെഎസ്ആര്ടിസി സര്വീസുകള് സ്തംഭിക്കാനാണ് സാധ്യത.