ന്യൂഡല്ഹി: ജവഹര്ലാല് നെഹ്റു സര്വകലാശാലയിലെ (ജെഎന്യു) മുന് വിദ്യാര്ഥി യൂണിയന് പ്രസിഡന്റ് കനയ്യ കുമാറിനെതിരായ രാജ്യദ്രോഹക്കേസില് ഡല്ഹി പോലീസിന് ഡല്ഹി കോടതിയുടെ രൂക്ഷവിമര്ശനം.
നിയമവകുപ്പിന്റെ മുന്കൂര് അനുമതിയില്ലാതെ കുറ്റപത്രം സമര്പ്പിച്ച പോലീസിന്റെ നടപടിയെയാണ് ഡല്ഹി കോടതി രൂക്ഷമായി വിമര്ശിച്ചത്. എന്തുകൊണ്ടാണ് അനുമതി വാങ്ങാതെ കുറ്റപത്രം സമര്പ്പിച്ചതെന്നും കോടതി ചോദിച്ചു. പത്ത് ദിവസത്തിനകം അനുമതി വാങ്ങി നല്കാമെന്നും പോലീസ് കോടതിയെ അറിയിച്ചു. അനുമതിക്കായി ഫെബ്രുവരി ആറ് വരെ കോടതി ഡല്ഹി പോലീസിനു സമയം അനുവദിച്ചു.
രാജ്യദ്രോഹക്കേസുകളില് സര്ക്കാരിന്റെ മുന്കൂര് അനുമതി വാങ്ങിയ ശേഷമേ കുറ്റപത്രം സമര്പ്പിക്കാവു എന്നാണ് ക്രിമിനല് നടപടി ചട്ടത്തിലെ വ്യവസ്ഥ. കേസില് കഴിഞ്ഞ തിങ്കളാഴ്ച്ചയാണ് കനയ്യകുമാര് അടക്കം പത്ത് പേര്ക്കെതിരെ ഡല്ഹി പോലീസ് പട്യാല കോടതിയില് കുറ്റപത്രം സമര്പ്പിച്ചത്. 1200 പേജുള്ള കുറ്റപത്രമാണ് കോടതിയില് പോലീസ് സമര്പ്പിച്ചത്.
കനയ്യ കുമാര്, ഉമര് ഖാലിദ്, അനിര്ബന് ഭട്ടാചാര്യ തുടങ്ങിയവര്ക്കെതിരെയാണ് കുറ്റപത്രം തയാറാക്കിയിരിക്കുന്നത്. രാജ്യദ്രോഹത്തിനു പുറമേ ക്രിമിനല് ഗൂഢാലോചനയും കള്ളരേഖ ചമയ്ക്കല് ഉള്പ്പെടെയുള്ള കുറ്റങ്ങളും പോലീസ് ചുമത്തിയിട്ടുണ്ട്.
പാര്ലമെന്റ് ആക്രമണക്കേസിലെ മുഖ്യസൂത്രധാരന് അഫ്സല് ഗുരുവിന് ജെഎന്യുവില് അനുസ്മരണം നടത്തിയ ചടങ്ങില് ദേശവിരുദ്ധ മുദ്രാവാക്യം മുഴക്കിയെന്ന് ചൂണ്ടിക്കാട്ടിയാണ് കനയ്യ കുമാര് ഉള്പ്പെടെയുള്ളവര്ക്കെതിരേ പോലീസ് കേസെടുത്തിരുന്നത്. 2016 ഫെബ്രുവരി ഒന്പതിനായിരുന്നു സംഭവം.