മഞ്ചേരി: മഞ്ചേരി മെഡിക്കല് കോളേജില് ആളുമാറി ശസ്ത്രക്രിയ നടത്തിയ സംഭവത്തില് ആരോപണ വിധേയനായ ഡോക്ടറെ സസ്പെന്ഡ് ചെയ്ത് അന്വേഷണം നടത്താന് ആരോഗ്യ വകുപ്പ് മന്ത്രി കെ കെ ശൈലജ ഉത്തരവിട്ടു. സംഭവത്തില് ജില്ലാ മെഡിക്കല് ഓഫീസര്, മെഡിക്കല് കോളേജ് സൂപ്രണ്ടിനോട് റിപ്പോര്ട്ട് തേടി. കുറ്റക്കാര്ക്കെതിരെ നടപടി ഉണ്ടാകുമെന്ന് ആശുപത്രി സൂപ്രണ്ട് നേരത്തെ വ്യക്തമാക്കിയിരുന്നു.
മലപ്പുറം കരുവാരക്കുണ്ട് സ്വദേശിയായ 7 വയസുകാരന് മുഹമ്മദ് ഡാനിഷിനാണ് ശസ്ത്രക്രിയ മാറി ചെയ്തത്. മൂക്കിനുള്ളിലെ ദശ നീക്കം ചെയ്യാനാണ് ഇന്നലെ രാവിലെ ശസ്ത്രക്രിയ നിശ്ചയിച്ചിരുന്നത്. എന്നാല് ഡാനിഷിന് ശസ്ത്രക്രിയ നടത്തിയത് വയറിനായിരുന്നു.ശസ്ത്രക്രിയക്ക് ശേഷം മാതാപിതാക്കള് ഇക്കാര്യം അറിയിച്ചപ്പോഴാണ് ഡോക്ടര്മാര്ക്ക് പിഴവ് മനസിലായത്.
ഉദരസംബന്ധമായ രോഗത്തെത്തുടര്ന്ന് ശസ്ത്രക്രിയക്കായി മണ്ണാര്ക്കാട് സ്വദേശിയായ ധനുഷിനെയും ഓപ്പറേഷന് തീയേറ്ററില് പ്രവേശിപ്പിച്ചിരുന്നു. ഇവരുടെ പേരുകള് തമ്മില് മാറിപ്പോയതാണ് ശസ്ത്രക്രിയ മാറാന് കാരണമെന്നാണ് സംഭവത്തില് മെഡിക്കല് കോളേജ് അധികൃതര് നല്കുന്ന വിശദീകരണം. മാതാപിതാക്കള് ആശുപത്രി സൂപ്രണ്ടിന് പരാതി നല്കിയതോടെയാണ് സംഭവം പുറത്തായത്.