മുഖ്യമന്ത്രി പിണറായി വിജയനും കുടുംബത്തിനുമെതിരായ കറന്സി കടത്ത് ആരോപണങ്ങളില് കേന്ദ്ര ഏജന്സികള് എന്ത് നിലപാട് സ്വീകരിക്കുമെന്നാണ് ഉറ്റുനോക്കുന്നതെന്ന് പ്രതിപക്ഷ നേതാവ് വിഡി സതീശന്. നേരത്തെ സ്വര്ണ്ണക്കടത്ത് കേസിലെ മറ്റൊരു പ്രതിയും സ്വപ്ന ഇപ്പോള് നടത്തിയ അതേ ആരോപണം കുറ്റസമ്മത മൊഴിയായി നല്കിയിരുന്നു. എന്നാല് അന്ന് അന്വേഷണത്തിലേക്ക് പോകാതെ ബിജെപിയും സിപിഎമ്മും ചേര്ന്ന് ഒത്ത് തീര്ക്കുകയായിരുന്നുവെന്നും സതീശന് കുറ്റപ്പെടുത്തി.
മുഖ്യമന്ത്രിയുടേയും ഓഫീസിന്റെയും എതിരെ ഗുരുതരമായ ആരോപണങ്ങളാണ് സ്വപ്ന സുരേഷിന്റെ ഭാഗത്ത് നിന്നും ഉണ്ടായത്. ഇക്കാര്യത്തില് കേസെടുത്ത് അന്വേഷണം നടത്തണം. ഉമ്മന് ചാണ്ടിക്കെതിരെ ആരോപണം വന്നപ്പോള് ആരോപണവിധേയയുടെ കയ്യില് നിന്നും പരാതി എഴുതി വാങ്ങിയ ആളാണ് മുഖ്യമന്ത്രി പിണറായി. ഉമ്മന് ചാണ്ടിക്ക് ഒരു നീതി പിണറായിക്ക് മറ്റൊരു നീതിയുമെന്നത് പറ്റുമോയെന്നും സതീശന് ചോദിച്ചു.