കോഴിക്കോട്: എ കെ ജി സെന്റര് ആക്രമണക്കേസില് അന്വേഷണം ക്രൈംബ്രാഞ്ചിന് കൈമാറി സര്ക്കാര് നടപടിയെ പരിഹസിച്ച് യൂത്ത് കോണ്ഗ്രസ് നേതാവ് രാഹുല് മാങ്കൂട്ടത്തില്.
കസേരയിലിരുന്ന് വായിക്കുമ്ബോള് ഞെട്ടിയ കേസ് അന്വേഷണം ഇ.പിയില് നിന്ന് ക്രൈംബ്രാഞ്ച് ഏറ്റെടുത്തുവെന്ന് രാഹുല് ഫേസ്ബുക്കില് കുറിച്ചു.
ശനിയാഴ്ചയാണ് എ.കെ.ജി സെന്റര് ആക്രമണക്കേസിന്റെ അന്വേഷണം ക്രൈംബ്രാഞ്ചിന് കൈമാറി ഡി.ജി.പി അനില്കാന്ത് ഉത്തരവിട്ടത്. സംഭവം നടന്ന് 23 ദിവസമായിട്ടും പ്രതിയെ കണ്ടെത്താന് സിറ്റി പൊലീസ് കമീഷണറുടെ നേതൃത്വത്തിലുള്ള പ്രത്യേക സംഘത്തിന് കഴിയാത്ത സാഹചര്യത്തിലാണ് അന്വേഷണം ക്രൈംബ്രാഞ്ചിന് കൈമാറാന് തീരുമാനിച്ചത്.
ക്രൈംബ്രാഞ്ച് മേധാവി ഷെയ്ഖ് ദര്വേശ് സാഹിബിന്റെ മേല്നോട്ടത്തില് പ്രത്യേക അന്വേഷണസംഘം രൂപവത്കരിച്ചായിരിക്കും തുടര്ന്നുള്ള അന്വേഷണം. തിങ്കളാഴ്ച സിറ്റി പൊലീസ് കമീഷണര് സ്പര്ജന്കുമാര് കേസ് ഫയലുകള് ക്രൈംബ്രാഞ്ചിന് നല്കും.
ജൂണ് 30ന് രാത്രിയാണ് സംഭവമുണ്ടായത്. ഇതുവരെ 1300 ഓളം ഇരുചക്രവാഹനങ്ങളും നാനൂറോളം ഫോണ്കാള് വിവരങ്ങളുമാണ് പരിശോധിച്ചത്. എന്നാല്, സ്ഫോടകവസ്തു എറിഞ്ഞയാളെക്കുറിച്ച് വിവരമൊന്നും ലഭിച്ചില്ല.